Rastrind, là, Tchan.nik[1]
Là d’djà d’ ça quéqu-r-anêyes, i gn-avot yu in grand moustradje du twâyes dès-ârtisses tchaboreûs du hôt d’ l’êwe du Lèsse. Is-astint là tourtous, èt avu leûs mèyeûs-ovradjes. T’avos l’ Châles Dèlaîte avu sès dèssins d’ pèyisadjes d’avaurci, bês à v’ dusaurnier l’ coeûr, èt pîs t’avos tous lès-ôtes.
Quand il è yu seû la nouvèle, Tchan.nik s’è dit dins li-min.me : « Pouqwè qu’ dju n’î îros nin ossi, don, mi? Il ont d’djà bin gobé brâmint d’ mès couyes, èt asteûre dju m’ vas lèzî djouwer cinq rôyes avu in tchaboradje bin da min.ne. »
Adon, il apwâte ou moustradje ène grande twâye t’tossi blantche qu’ène tîkète qu’ è sté mètûye à l’ rumoye deûs djoûs au long. « Dju gadje qu’ i gn-aurè bin in zigomârd qui m’ la va acheter pou bin yauke », di-st-i.
Lu djoû qu’ on z-è strimé lu moustradje dès twâyes, i gn-avot tous lès grands mènîrs dès p’tites viles d’avaurlà, èt min.me co brâmint dès djins du-d-pus lon. Vou-t’-là, wê, in p’tit bokèt d’ome, in Brussèlwès, dandjereûs, avu dès tch’vès… — maîs astot-ç’ bin dès tch’vès, cès longus fustus d’ poy-là qui brikint fû d’ sa tiêsse ? C’astot ène hure, ene poyetrîye, quu t’ n’auros yu dit l’ diâle qui ruv’not du l’ chîje — vou-l’-là, dis-dj’, qui gangne après la twâye qu’astot t’tossi blantche quu dul blantche nîve su l’ hoûssê du dos d’ène blantche bascolète.
Tchan.nik lu wèyot ariver, sés’, li, avu sès fins solés.
- C’èst bin vous l’ârtisse qu’ è tchaboré ç’ twâye-ci ? qu’i d’mande lu p’tit Brussèlwès.
– Tais’ qu’ây quu c’èst mi !, ruspond Tchan.nik.
– Çu n’èst nin pou ça, v’s-ôz d’ l'idêye, di-st-i l’ Brussèlwès. Maîs çu quu dju n’ wès nin bin, c’èst comint qu’ i faut comprinde vosse chèdeûve.
– Pourtant, i gn-è rin d’ pus aujî, di-st-i Tchan.nik: c’è-st-ène vatche qui mougne dul yêbe dins in pachi.
– Tins!? di-st-i l’ôte, èt èdû ç’ qu’èlle èst la yêbe, insi ?
– Èle n’èst pus là, don, pîsquu la vatche l’è yu à l’ panse.
– Èt bin, û ç’ qu’ èlle èst la vatche, adon?
– Bin, pîsqu’i gn-avot pupont d’ yêbe à pacher, èlle è vôye pastèrer ôte paurt, parit !
walon du hôt d’ l’êwe du Lèsse.
- rastrind, là Tchan.nik: arrête ton char, Ben Hur
- tchaborer: mettre en couleur, en peinture; ârtisse tchaboreûs: artiste peintre.
- moustradje n.m.: exposition.
- Lu hôt d’ l’êwe du Lèsse: la Haute-Lesse.
- duzaurnier: émotionner, désorienter.
- couye n.f.: blague.
- djouwer cinq rôyes: jouer un tour à sa façon.
- tîkète: tête d'oreiller.
- mète à l’ rumoye (linge): laisser le linge la nuit sur l’herbe.
- zigomârd n.m.: drôle d'individu.
- strimer: étreiner; strimer in moustradje du twâyes: vernissage d'une exposition de peintures.
- in bokèt d’ome: un homme minuscule.
- dandjereûs: probablement.
- lès grands mènîrs: les personnalités.
- fustus n.m.: fétu.
- poy: poil.
- briker: faire saillie;
- il è ène hure come lu diâle qui r’vint dâ l’ chîje: il a les cheveux en désordre.
- lu hoûssê du dos: la peau de la ligne du dos.
- bascolète: belette; aussi hermine.
- i l’ wèyot ariver avu sès fins solés: il voit où il veut en venir.
- pachi: verger.
- yêbe: herbe.
- èle l’è à l’ panse: elle l'a dévoré(e).
- pacher = pastèrer: paître.