Tåtî l’ pèriquî/Ake III, Sinne I

Édouard Remouchamps

Ake III, Sinne I

rortografiaedje da Jean Haust

Tåtî l’ pèriquî, 1934 (rortografiaedje)

Tåtî l’ pèriquî/Ake III

Tåtî l’ pèriquî/Ake III, Sinne II

Ake III, Sinne I

Pènêye, Djètrou

DJÈTROU (moussèye come lès noûrices d’asteûre, avou l’ bonikèt gårni d’ rodjes rubans qui pindèt disqu’ al tére).
Pènêye, kumint m’ trovoz-v’ avou mes beas camatches ?
PÈNÊYE (moussî come lès dômestiques di ritchès mohones, avou l’ rodje côrsulèt, li blanc vantrin a glèteû, li neûr pantalon, lès blankès tchåsses, etc.).
Djo troûve qu’on n’ dîreût dja l’ cisse qui wârdéve lès vatches
765 D’vant do vinde dès ramons.
                       DJÈTROU.
                         Èn’do ?
                        PÈNÊYE.
                                Èt mi, so-dj’ bê,
Djètrou ?
                       DJÈTROU.
          Oyi, t’ès gây po on hièrdî d’ pourcês !
On n’ dîreût dja l’ martchand du platês, d’ cwîs èt d’ loces.
                        PÈNÊYE.
Tot come djo veû l’afaîre, djo so moussî a t’ gos′ ?
                       DJÈTROU.
Twè ? t’ ravises on d’guîsé !…
                        PÈNÊYE.
                               Èt twè, quu ravises-tu
770 Avou tès lâtchès nâles, si longues qu’on fole dussus ?
                       DJÈTROU.
Ay, pus longues sont lès nâles èt pus ritches sont lès maîsses,
Dit l’ vî. Mins twè, Pènêye !
                        PÈNÊYE.
                              I vât co mîs qu’on s’ taîse.
                   DJÈTROU (tot riyant).
Waîte âs dindons, valèt, avou t’ rodje côrsilèt !
                        PÈNÊYE.
C’è-st-apreume twè, sins fåte, avou tès rodjes flokèts !
                   DJÈTROU (tot riyant).
775 Abiyîs come çouci, nos-èstons-st-one bèle cope
Po-z-aler soper foû !
                        PÈNÊYE.
                     Nu badinons nin trop′ ;
N’ sèrons fwêrt bin vouci.
                       DJÈTROU.
                           Qwand t’ magn’rès, qu’ dîrès-s’ por ?
                        PÈNÊYE.
Djo vou dîre quu n’ sèron bin ci po fé l’amor.
                   DJÈTROU (tot riyant).
N’ djâsoz nin d’ fé l’amor qwand v’ n’avoz rin è vinte !
                        PÈNÊYE.
780 Ay ! on magn’rè sins fâte ?
                       DJÈTROU.
                             S’i fât co ‘ne gote ratinde,
M’ vinte plaqu’rè-t-a mès rins. Quu l’ diâle qwand magn’rè-t-on ?
Djol vôreû bin sèpeur.
          PÈNÊYE (tot s’alant aspoyî al finièsse).
                        I n’ djâse mây du magn’hon.
                       DJÈTROU (a pårt).
S’i n’ djâse mây du magn’hon, i djâse d’autès-afaîres !
Dj’a lès pinses qu’i sét bin stronner l’ poye sins l’ fé braîre ;
785 Mins c’èst dès p’tits mèssèdjes qu’on n’ dit nin âs galonts.
I n’ fât nin qu’ sèpèsse tot, i sèrît trop savonts.
Djo n’ so nin a k’taper,… Su dj’ lî féve toûrner l’ tièsse,
Èt qu’i m’ vôreût sposer, come il a dès ritchèsses,
Çoula m’ahâyereût fwêrt. Sèreût-ce lu prumî côp
790 Qu’one âd’neûse âreût v’nou sposer on ritche bâbô ?