Tåtî l’ pèriquî/Ake II, Sinne V

Édouard Remouchamps

Ake II, Sinne V

rortografiaedje da Jean Haust

Tåtî l’ pèriquî, 1934 (rortografiaedje)

Tåtî l’ pèriquî/Ake II, Sinne IV

Tåtî l’ pèriquî/Ake II, Sinne VI

Ake II, Sinne V

Tåtî, Nonård

    NONÅRD (tot v’nant prinde Tåtî po l’ main).
615 Bondjoû, savez, monnonke ! Proféciyat′, savez !
Dj’a corou tote li vôye po v’ni v’ compluminter.
Qwand c’èst qui dj’a-st-apris qui v’s-avîz lès cint mèyes,
Dj’a stu si binåhe, dê ! Vos n’ v’è f’rîz nole îdèye !
Dji v’ lès keû mîs qu’a mi !
                     TÅTÎ (a pårt).
                             Fåt-assoti d’ boûrder !
  (Haut.)
620 Tin ! èstez-v’ raviké ? Dji v’ pinse mwért, ètèré ;
Dji v’s-a faît soner ‘ne transe ! N-a treûs-ans d’ peûrs dîmègnes
Qu’on n’ vis-avasse vèyou !
                 NONÅRD (a pårt).
                            L’ vî pindård, qu’il èst strègne !
   (Haut)
Si dj’ n’a nin v’nou, monnonke, schoûtez, dji n’è pou rin :
Tos lès canåls dèl Vèye, come vos l’ savez sont plins.
625 Po r’wangnî l’ timps pièrdou, nos-ovrans so nos fwèces ;
Nos trîmans nut′ èt djoû, tél’mint qui çoula prèsse !
                      TÅTÎ.
V’ n’avîz qu’a d’morer la ! A-t-on jamåy vèyou !
                 NONÅRD.
Monnonke, dj’inme tant di v’ vèy !
                      TÅTÎ.
                                  Vos-èstez trop marlou !
Aprindez on p’tit pô qui, mi, dji n’ so nin l’ Vèye,
630 Po m’ lèyî, d’ tos vos-autes, mète dès pouces ! l’orèye
Èt m’ fé creûre qui lès poyes pounèt so lès bouhons !
Mins dj’a aute tchwè a v’ dîre …
                 NONÅRD (tot riyant).
                                 Si c’è-st-ine saqwè d’ bon …
                      TÅTÎ.
Dji v’ vou dîre qu’a målvå vos v’nez dîre vos fåst’rèyes :
Dji m’ va marier.
                 NONÅRD (èwaré).
                Marier ?… Vos f’rîz ine cråne bièst’rèye ;
635 Prinde ine feume ! a voste adje !… Vos badinez, èdon ?
Pa ! c’è-st-ine foye di route, çoula, po Robièmont !
                      TÅTÎ.
Qu’èst-ce qui ça faît si dj’ moûr ? Alez, sèyîz tranquile :
Po ramasser çou qu’ dj’a, dj’årè ‘ne pitite famile.
                 NONÅRD.
N’ fez nin çoula !
                      TÅTÎ.
                   Dji v’s-ô, avou vos gros sabots !
640 Qwand on oûveûre po l’ Vèye, on d’vint trop fin matchot.
Ralez d’vins vos canåls djouwer ås rèspounètes !
Alez, Nonård, dj’inme mîs vos talons qu’ vos bètchètes !
                 NONÅRD.
Vos-avez twért, monnonke, di m’årgouwer ainsi !
Divins tot l’ parintèdje, nin onk ni v’s-inme come mi.
645 V’s-èstez målaîdûle oûy, dji r’vinrè-t-ine aute fèye,
Èt vos m’ riçûrez mîs … Å r’vèy, monnonke !
                      TÅTÎ.
                                             Å r’vèy
           NONÅRD (tot ratoûrnant).
Monnonke ! come vo-v’-la ritche, loukîz dè n’ nin m’ roûvî.
                     TÅTÎ.
Si dji troûve ine cahote, dji v’s-èvôy’rè l’ papî.