One suteûle ! Cisse djon.ne fêye ènn' èsteût one. Nole comparêzon nu s' pôreût imadjiner kwand k'on-z-aveût avou l'boneûr du fé s' kunohance. Lu steûle èst r'lûhante, vèyåve di si lon d'vins l' neûre nut'. Èle règuèye vos-oûyes, vos-îdés, vosse coûr. Mins-ell' èst freûde ot.tant ku l' tchandèle du glèce, èt distânte avou tos sès-admirateûrs.
Dj'ènnè pous djåzer d' â d'dins. Sins rin fé, èle mu dustrûha lès-oûyes ; dju n'vèyéve ku lèy. Èle mu dustrûha l' cèrvê ; dju n' poléve pus pinser clér'mint kwand dju tûzéve à lèy. Èle mu dustrûha l' coûr ; nole feume, nole båcèle n'atiréve pus mès dèzîrs.
Èt si dj' èl dis, djåzant duspôye mu sitouwâchon pèrsonèle, n's-èstîs tûrtos andoûlés, l'ètind'mint aveûlé èt l'voleûr sins pus nole fwèce.
Wice l'a dj' èsconstrêye ? N's-avîs one påhûle putite plèce, nin lon dès boul'vârds, on pô ritrête, "Lu P'tit Torê", po nos règuèyî, beûre on côp, hoûter du l' muzike, guîncher on p'tit pô kwand ça touméve. Nos-î alîs après lu spèktake, tél'fîs lu cinèma. One sècrète plèce : on poléve djåzer du nosse sîze, magnî on bokèt trinkil'mint. Nos n'avîs nin dès-abitûdes du guindaye ; one bîre o deus' nos sufizînt.
Çu swèr-là, èle intra o l' brass'rêye tote adawiante, pus bèle k'one fleûr o k'on pâwion. Nouk du nos-ôtes nu l'aveût vèyou d'vant. Nouk du nos-ôtes nu sépéve su nom. Nouk du nos-ôtes nu k'nohéve su rowe, si-adrèsse. Èt lèy nu r'loukéve nouk du nos-ôtes.
Èle nos f'za toûrner l' tièsse, èt chask'onke lî åreût volou djåzer, ruçûre on doûs r'gård du sès bès-oûyes, sinker on vére o on p'tit-amagnî, saveûr kî èle esteût, èt pokwè èle aveût m'nou voci.
Freûde, aveûs-dj' dit ? C'èst co trop pô : por lèy, nos n'egzistîs nin.
Çoula dura dès djoûs, dès samin.nes ! Dju pous dîre ku durant l'tèyåte, l'opérå, lu film, nos tûzîs â d'zeû d'tot à çou ki vinreût après. Lu p'tite brass'rêye, lu mèrvilyeûse djône fêye sins parèy. À l'plèce d'an'mirer lès-akteûrs, lès rèplikes, les-êrs, lès dècors, n's-èstîs d'vins nos sondges, nos-èspwèrs, nos sohintîs miråkes. Turtos, n's-ârîs volou pårti on tot p'tit bokèt du si-atincyon, aksèpter bin môdèss'mint lu mônde mot. Mins, bast' ! Rin, èt min.me rin du rin. Nos 'nnè dwèrmîs pus, èt n'polîs djåzer inte du nos-ôtes ku d' lèy, Lèy, LÈY !
Lès-ôtes djon.nès dgins nos sonlînt bin bièsses du n' nin l' kunohe, èt d' tûzer à nimpôrtukéle sakî, sâf lèy. Por nos, il èstînt vûdes, leûs vêyes n'avint pont d' bon sins′.
Kumint !? Kumint a-dj' polou ! ? Kumint a-dj' wèzé ! ? Dju n' èl sé nin mi min.me, èt dj' sos sûr ku dju n' èl séprè djamåye. On miråke ? One folîye, pus rade. Mins si tél'mint bin-ureûse !!! Tote mu vêye, dj'ènnè r'mèrcîy'rè l' Cîr. Min.me si asteûr, çu boneûr a r'fondou è låmes.
À l' fin du l' swèrêye, èle aspitéve, s' aléve achîre è 'n-one cwène on pô r'tirêye, nin tot près do comptwèr, o do l' plèce wice on dinséve, èt k' nos loumîs gradiveûz'mint "lu pisse", bovéve on vére du té èt pik'téve kékès rins du tout, chips o rostêyès grin.nes du kakawète, o d' grand solo. On n' èl vèya måye magnî on vrê r'pas.
Çu djoû-là, djoû bèni !, èle intra on pô èssouflêye, come si èle aveût d'vou cori, èt s'ala instaler so si-åbitouwèle tchèyîre. Dju l'vèya si tél'mint troûblêye (mins, por kwè ??), ku dj' prinda tot m'corèdge, èt lî pwèrta on vére du té à l' minte , come èle aveût acostoumèdge. Mon Dju ! Èle nu r'fûsa nin, s' loukåde èt s' vizèdge mu dèront on dgînti mèrci. Dju n' mu wèzéve ning achîre, mins d' on p'tit côp d' minton, èle mu f'za sègne du mu m'ni mète à costé d' lèy. Dè côp, dju rouvia l' bîre ku dj' aveûs lèyî p' adrî d' mi. Rin, mins rin, nu m' åreût polou fé kwiter c' paradis, èt diminouwer m' tôtål boneûr po n'importukéne prèyokoupâchon. Lu feu åreût polou prinde duvins l'èstaminet, lès meurs croûler p' on tronl'mint d' tére, o dès côps d' canon sclater, dju n' åreûs kwité m' plèce.
On pô djalos (comprurdoz-z-èls ! ), mins binvèlyants, mès camarådes nos lèyint è påye ; dju n' oya nole du cès riyotrêyes on pô loûrdingues, o min.me grossîres, ki m'arînt sûr djèté foû d' mi, èt k' ârînt polou fé dè l' pon.ne à l' èstchantrèsse princèsse.
Tot d'monant galant èt chièrvûle, dju n' djåzéve wère, sogne du môstrer l' volcan ki broûléve è mi. Lèy n' èsteût nin pus babiliåde èt n' n'avans duscandjî ku kékès rårès parales, è fwèrt coûtès frazes.
Èt, tot frûzihant, dj' a-st-avou l' corèdge — ây dju l' a-st-avou ! — p' on bê doû slow, du lî prinde lu min èt du l' muner vè l' pisse. Èle aksèpta èt m'na avou mi po danser on pô. Lu rêne nu mèska s' plêzi, èt çoula d'vins lès brèsses d' on man'dâye come mi !
Avans-n' djåzé ? Dju n' m' ènnè sovins nin. Sès r'gârds, sès sorîres, lès mom'mints du sès ddj'vès, çoula m' sufizéve. K'èst-c' ku dès mots arînt polou amuner d' pus' ? Èle mu sonla tote rècrèstêye, su rèspiråcyon rudum'nowe nôrmale. Portant, dju fous sêzi po l'blankeûr du s' tint, come lu ci d' one sakî k'âreût stu malåde, d'monant è s' manèdge o bin è l' ospitå, sins veûr l' â d'foû. Su pê n' aveût sûr vèyou l' solo duspôye one bone périôde. Mins èle n' èsteût mons bèle, èt cisse pâleûr rivalizéve avou l'ruglatihance du l'émay du sès dints.
Dju n' mu poléve nåhî du l'an'mirer, du l' contimpler, lu gris-bleû d' sès-oûyes, lu noyèzeté d' sès-orêyes, lu dèlicatèsse du sès deûts, lu finèsse du s' djèvèlôre, brone on pô rodge…
Dj' åreûs volou ku c' moumint durahe tote l'étèrnité…
D'on côp, èle mu louka d' apeûrés-oûyes èt d'ha : "Dju deûs…". È l' sègonde, èle n' èsteût pus là ! Cori à l'ouhe du l' brass'rêye, loukî lès deûs costés dè l' rouwale : disparowe ! R'toûrnant èmé lès-ôtes, dju d'mora mouwèt ; nin målåhèye du saveûr ku m' vére dumona come il aveût stu. Nin målåhèye nin pus d'imadginer ku dju n' dwèrma cisse nut′.
Ku f'za-dj' lès sûhants djoûs ? I m' sonle ku dj' a magnî, dj' m' a lâvé èt râzé, dj' a séhou lès coûrs. Mutwèt. Nole clére som'nance.
One samin.ne pus tård, « En attendant Beckett ». Çu n' èsteût nin l'idèyål po m' moral, mins dès camarådes avînt purlôtchî, ku dju r'prindahe nos-abitûdes du d'vant. Lu spèktake oute, nos nos rèdjondîs â P'tit Torê, lès-ôtes cumintant lu mèssèdge, èt l' djeû dès-akteûrs ; mi, l' tièsse è l' êr èt l' coûr todi rakafougnî.
N' beûvîs nos bîres, lu pwète su drova : lèy ! Èle aveût rum'nou ! On p'tit hoss'lèdge du l' tièsse po tûrtos, on p'tit sorîre por mi, ki d'héve : " « Pokwè d'moni lâva ; nu m' lèyoz seûle ». On djône tching à kî on-z-ofeure one rondèle du såcisson n' åreût nin suhou avou ot.tant d' ruknohant plêzi. Èle m' åreût c'mandé du griper so 'ne tåve èt d' cokèriker, dju l' åreûs fé pus' ku voltî. Mins èle su continta du tapoter, du s' dèlikate blanke munote, l' vèloûrs du l' bankète, ku dj' m' achîyahe djondant lèy. Èle aksèpta, come l' ôte côp, one jate du té, k' èle låma à p'tits gordjons, d' one si pléhante manîre. Mins èle nu vola ring ètinde à propôs d'one putite eûrêye.
Dju tem'ta d'aprinde on pô pus' sor lèy, mins èle nu rèsponda à nole du mès kèsses. Rin ku s' putit nom : Ivanya. Rin so du wice èle vunéve, su mèstî, si- adrèsse… Dju d'mona gros dj'han come duvant. Kwand l' jate fout vûdîye, èle pona s' min so mi-avant-brèsse, èt sès-oûyes môstront lu cwène adgincêye è mitan dès tâves, po-z-î poleûr danser. Du novê, â d'zos dès loumîres du l' pisse, dju nota l' pâleûr du s' pê, come lu cisse dès grandès madames do timps passé. Çu n'èsteût nin maladif, mins évokéve lu fragilité d' on-oûhyon so l' bwèrd do niyå, d' on pétale du bleû-z-oûye d'andge, d' one putite duhotante flame, prète à lèyî l' tchandèle.
Dès slows, kékès valses o tangos, mèlancolêye èt påhûlisté. Si l' muzike dum'néve pus tapante, pus rokante, nos n's-alîs rachîre, rawårdant k'èle rudum'nahe pus keu.
" Oh, dju deûs…". Èle èsteût ddjà vôye ! Sâyî d' èl porsûre, mins ring à fé. Dju rintra, prézint d' cwèrps, absint d' pinsêyes. Sins s' moker lu mons' dè monde, on camaråde m' akeûya : " Nosse Xavier a trové s' Cindriyon." .
Dju vèrifya l' eûre ; çu n' èsteût nin mèye-nut′, pus rade one afére du deûs-eûres èt d'mé. Â prumî côp, dju n'aveûs pinsé à loukî m' mônte.
Sakwants djoûs èvôyes, èt on fwèrt bon film, " Lu sihin.me Sins′ ". Lu P'tit Torê, come tofèr. Nos djåzîs do suspèn'se, du l' muzike, du cisse îdé du fé vèy dès mwèrts à one sakî ki n' èst pus do mônde dès vikants. Lu gèniye du Shyamalan, lu djeû da Bruce Willis èt d' Osment, lès dècôrs,… nos-okupînt à duscrire, dusmonter, an'mirer. Èt Lèy fout là, sins k' on l'eûhe vèyou o ètindou ariver !
Come si ç’ aveût stu réglé, dècidé d’avance, nos nos r’trovîs à costé l’onk du l’ôte so l’bankète, su vére du té d’vant lèy, èt mi one trapise, sins-aveûr rin k’mândé à nouk. Dju r’sâya du l’ fé djåzer d’ lèy, n’åreût-c’ sutu k’on p’tit pô, mins èle sépa hwèrner èvôye mès-intèrogåcyons. Tot çou k’ dj’aprinda fout k’èle in.méve lu té, nin trop d’ souk, èt l’ spitante êwe durant lès tchôds djoûs. Nole prèfèrince, nole ahåyance po l’ neûriteure. Çoula m’aksègna ossu one ôte sakwè. Alôrs ku ring à si aspèt fizike n’indikéve one sakî m’nowe d’on londgin payî, ku clérmint èle n’èsteût ning orijinère d’Afrike, du Chine, do Mèksike, o, pu près d’amon nos-ôtes, do Magrèb, du Skandinavîye o dès slaves payîs, si aksant mu l’ fuza pinser Roumêne, Yougoslave, mutwèt Blugâre o Ongrwâze. Su coleûr du djuvèlôre, su manîre du s’ moussî, su non, mîn.me, n’ î èsting-opôzés. Dussk’ à sès kékès råres djowês, k’ èstin bing ovrèdgîs, mîns nin clinkants. Vos l’z-î årîz åhêyemint ‘nné du l’ Damwazèle, o du l’ Comtèsse.
Kékès danses, dès plêhants-oûyes, one rizète. Dj’ aveûs tot po-z-èsse bing ahåyî, mins one sakwè mu tormintéve : wice bîzéve-t-èle èvôye, avou ké mwèyin?
Èt one ôte inkyètûde mu d’zournéve : wice vikéve-t-èle, èt du kwè, kwand-èle n’èsteût èmé nos-ôtes?
Dès côps k’i-gn-a, on-z-apice on-oûhê, mins po k’nohe lu niyå, on l’ lêt rèvoler, tot riskant du l’piède. Kî aksègn’ra âs-umins à s’ continter d’oûy, sins s’trakasser d’îr, o po d’min ? Sèrans-n’ on djoû sûtîs ?
Por mi, dj’aveûs m’n-idêye. Sépant ku m’ princèsse m’aléve lèyî à deûs-eûres èt d’mé, dju f’za come si dju mu dvéve aler soulager, èt dj’ moussa foû p’ one putite potèrne ki ‘nnéve è-n-on djårdin. Du là, dj’ poléve wètî l’ rouwale. Èle ariva, rotant reûmint, passa d’vant mi, èt fila inte les håyes dès coûrtis ki-èskaladin l’ tièr. Èle rotéve si vite, i f’zéve si neûr, ku dju l’pièrda après kékès munutes. Mins l’ pon.ne n’aveût stu sins-ûtilité : dju sépéve dè mons’ lu dirèkcyon du s’ rutoûne à s’ mâhon.
Treûs djoûs pus tård, dj’aveûs polou consulter cartes-èt plans du c’ costé du nosse putite cité. So lès hôteûrs ki m’ intèrèssin, rin du notåve po çou ki r’louke â monde d’ asteûre : pon d’ grandès scoles, pon d’ lègnes du bus’ o d’ tram, nou cênte du comèrce o d’ cultûre, nole clinike, … Dès påhûlès rowes, dès vîhès mohones, one placète, on soûrdant, capté po l’ fontin.ne, dès p’tits coûrtis avou kékès frûtèdges, rin d’ fwèrt passyonant. One pårticulårité : on tèrin assez grand, todi prôpièté do Diyocèze. So ‘ne carte vîhe du pus d’ deûs sièkes, on r’veût çou k’i-gn-aveût lâva. On vî mostî, l’Èglîze Sint Pancrasse, l’ête dès Côrdèlîs, one tchapèle, on prèsbutére.
Dju dècida d’ m’ î aler pormuner èt duscovri çu cwène pô k’nohou du l’ vèye, du sès gâres, sès-èchangeûrs, sès lîcés, sès grands magazins.
C’èsteût bin come dju l’aveûs pinsé : nos-avîs deûs vèyes duvins one, lu môdèrne, èt l’ cisse dès timps passés. Dju trova bråmint do charme, du sèdukcyon min.me, duvins lès vîhès rowes, lu frisse êr, lès sâvadgès fleûrs, lès tchip’tèdges. I m’ sônléve mu trover lon, fwèrt lon, d’vins l’ èspace o d’vins l’ timps.
Lès tèrins d’ l’Èglîze ont stu rèyamènagés po-z-î ovri on parc, duhans mî : on vièrt èspace, ca i n’a wère du dgins ki s’î pormunèt, o d’èfants ki djowèt, ni d’ hame, po lîre su lîve o s’ magazine.
Du Sint Pancrasse, i n’ dumant k’ on dalèdge, èt on panê èsplikatif ; lu tchapèle èst co d’bout, mins aban’nêye ; lu prèsbutére, one mâhon po treûs manèdges ; dès ècloses dès Côrdèlîs, on veût co dès rèsses du meurs, dèlimitant l’ ête : kékès bouhons, on pavé d’ pîre èt one creû voci vola, deûs rôy’lées du tiyous. Pon d’ brut, pon d’bisteûs, pon d’ oûhê, min.me.
C’èst donk d’vins c’ kårtî k’èle dumant, mu dis-dj’. I m’ fârè rawètî lu bètche du l’ Rowe Sinte Agate, ki rèdjont l’â-d’zos èt l’â-d’zeûr. ‘N a pus k’à ratinde k’èle ruvène â P’tit Torê.
Èle rum’na, tofînr pus-afriyolante, m’ rindant du fèy à fèy pus-aloûrdiné èt amoureûs. Mins, todi bin dècidé à ‘nnè saveûr pus’, dju sâya co, deûs’, treûs cops, d’ èl sûre ; mins-èle dusparèhéve duvins çou k’ dj’ aveûs batizé « labirinte do Tièr ». A l’ veûr, fêt-à-fèt k’ èle lèyéve po drî l’ mitan-vêye, èle rotéve du pus-en-pus reû, si fèt ku dj’ n’ arivéve ning à s’ vitèsse, èt k’ dj’ èl pièrdéve.
Dju rum’na donk à m’ îdêye du l’ rawårder so l’ vôye vè Sint Pancrasse, loukant du n’ mu nin fé vêy. Samin.ne après samin.ne, dju tèm’ta c’ djeû, mins po n’ ring obtuni : èle mousséve foû d’ Sinte Agate, dju voléve nu la nin piède dès-oûyes, o min.me dès-orêyes, mins èle su saveût fé sofla, èt dju n’ l’ aporçuhéve pus. Dè mons’, fêt-à-fèt, dju rèyussiha tot l’ min.me à gangnî dès pwints du r’pére : one mâhon, one creûh’låde du rouwales, on rumarkåve åbe, wice dju poléve lu wètî kékès djoûs pus tård, èt du là, r’prinde mu porchûte.
Dju n’ pinse k’ èle su rinda måye compte du mès filateûres, dèskénes, po dire lu veûr, dju n’ èsteûs nin fwèrt fîr. Dj’aveûs on-amér gosse è l’ boke, on sintumint d’ culpabilité : dju dusgrådéve mu Steûle è-n-one sôre du dgibî, k’on piste, sût à l’ rote, trake dusk’ à s’ tanîre. Po lî fé kwè ? Dju sés bin ku dju n’ l’åreûs djamåye agrèssî. Alôrs, k’ èspérè-dj’? I m’ sonle ku dj’ ènn’ è savéve rin mi min.me, èt ku, min.me asteûre, dju n’ èl pôreûs espliker. C’ èsteût andoûlèdge, duvins lukéne dju n’ poléve pus pinser sêv’mint. Dj’ èsteûs tôtal’mint èmacralé, èt, pus’ ku binamé, bin-ureûs d’ l’ èsse.
One sakwè rinda lu dgèstion dè l’ sitouwâchon d’ pus-en-pus målåhêye : l’osté èsteût oute duspôye dès samin.nes, èt l’ èrî-sâhon su môstréve kègnèsse èt grigneûze. Pon d’ osté du l’Sint Mârtin cist’ ånêye, mins ploûv’tiner, rafreûdi so ‘ne nut’, duvant d’ rumni tène, sèmer dès frîmas. Rin d’ fwèrt mètchant, såf po lès vîlès dgins èt lès malådes. È nosse cèrke, nos-èstîs djon.nes èt vigreûs, èt d’ pus’ bråmint okupés por nos-ètûdes. D’vins on meûs èt d’mé, nos sèrins l’ narène so nos-ègzamins. Çoula n’ aspètchîve nin nos sîzêyes du cultûre, èt lès p’titès rèyunyons k’ lès sûhin. Dju n’ lès-åreûs volou manker po ring â monde, bin sûr ; crèvé malåde, dju m’ åreûs trin.né foû du m’ tchambe, mins i n’ m’ a falou fé cisse fwèce-là
One sîze k’ Èle èsteût là, tot pårtihant l’ téyêre (bin, ây, dj’ aveûs mètou l’ bîre so l’costé, po-z-èsse pus djondant d’ lèy), dju r’mârka k’ èle n’ èsteût nin bing. Su vizèdge mu sonla nåhî, èle frûzihéve, èt n’ vola nin guîncher, min.me on p’tit côp. Dj’ous sogne k’ èle s’ åreût rafreûdi; dju lî dèri èt dju purlôtcha k’ èle pwèrtahe mu vèston. Èle nu f’za nin s’ soukrêye; lu « mèrci » k’ èle mu sussura â porfond d’ l’ orêye, mu ‘nnant l’ ôkâziyon d’ sinti s’ pârfum, muguèt, claw’son, viyolète, sonla à m’ coûr pus bê k’ totes lès-inlouminêyès bîbes k’ dj’ aveûs polou an’mirer, pus bê k’ lès-arias dès grands-opéras, o ku l’ viyoloncèle du Dvořak, pus bê k’ Rubèns, Dega o Modilyani. Fwèrt simplumint, èle tchåssa m’ vèsse, mins sès-oûyes mu d’hin : « èt vos? ».
Lès deûs-eûres èt d’mé alin-st-ariver, dju moussa foû po-z-aler prinde mu rawètance, èt sâyî oûy d’ aler on pô pus lon dins l’ rukwèrance du s’ lodgi.
‘N a-st-avou one sakwè à lukéne dju n’ aveûs nin tûzé, onyès’mint, èt lèy ossu. Mu vèston èsteût d’one clére coleûr, on gri cåzi blanc, èt s’ vèyéve du fwèrt lon è lu d’mé spèheûr du cisse cwène du l’ vèye, wice lès lampadéres n’ èstin nômbreûs. Çoula rinda mu sûhèdge pus-åhî, ca èle nu poléve ning åhèyemint mu r’mârker. Çou ki f’za, cisse nut’-là, ku l’ neûr la duschièrva : dju poléve veûr si-åbion d’ â lon, saveûr wice èle toûrnéve, lu pîd-sinte k’ èle gripéve. Dj’aveûs si tél’mint toûrné èt ratoûrné d’vins c’ kårtî ku dj’ rutrovéve mès r’péres, èt dj’ sépa râd’mint k’ èle montéve vè l’parc dès Côrdèlîs. Abitév’-t-èle l’ancyin prèsbutére? O mutwèt on pô pus lon, â k’minc’mint du l’ hindêye vè l’ rivîre ? Dju n’ aveûs k’ à m’ lèyî muner, nin por lèy, ki n’ l’ åreût volou, mins por mu vèsse. Alôrs ku dj’ pinséve k’ èle prinreût lu Tchèravôye, dusk’ âs kês, èle toûrna hådyès’mint so hlintche. Èle lu f’za sins holter, èt dju l’ vèya roter tot dreût vè ……… l’ ête !
Èle astoha on murèt, sièrpinta è mitan dès rèsses funérêres, èt, d’ on côp’ dju n’ èl vèya pus. Pus d’ one eûre, dju tem’ta du l’ kwèri d’ on costé o d’ l’ ôte, nin moyin du l’ rutrover ! Èle aveût sûr moussî foû do parc po ‘ne ôte vôye. I d’veût-èsse pus d’ kwate eûres kwand m’ tièsse, mu coûr pus rade, aksèpta d’ l’ aveûr pièrdouwe one fèy du pus’. Dj’aveûs on séryeûs-ègzamin progrâmé po l’ après-non.ne, èt dju d’va rintrer mu r’pwèzer on pô, pwis r’lîre mès notes du coûrs.
Lu prof’ aveût stu in r’tård, çou ki lî èsteût åbitouwèl. C’ n’ èst k’ à sih eûres èt d’mé ku dj’ pola kwiter l’Univ’ èt, sins r’toûrner à m’ tchambe, mutwèt tchôkî p’ on prèssintumint, dju fila â Tièr Sint Pancrasse. Â prèsbutére, kékès rårès loumîres, okultêyes po dès gordènes, mins d’vins l’ parc lu mîn.me, so l’ ête èt lès rwines du l’ èglîze, d’zos lès-åbes, i f’zéve bin neûr. On n’ vèyéve ku dès foumes, dès silouwètes, on r’flèt du l’ Bêté, ki m’néve du fé si-apâricyon, s’ one foye o on hyèrbin.
Soudin, è l’ ête, one sakwè d’ blan d’vins lu spèheûr tira mès r’gârds. Fruzihant, dj’ muna mès pas vè c’ costé-là (mins pokwè frûzihé-dj’?). Come dju l’ aveûs prèssintou, çou k’ dj’ aveûs sos lès oûyes, c’èsteût m’ vèston! Acroh’té à ‘ne creû ki clintchéve one mortuwère pîre.
Prindant on brikèt è m’ potche, après-aveûr hové du l’ min lès mwètès foyes, dj’ ariva à lére çou voci :
Mu frûzihèdge s’ èsplika.
Lu lèd’dumin â matin, on m’ rutrova, èvanouwi, so l’ tombe, sèrant si fwèrt mu vèston so m’ coûr k’i fala l’ fwèce du deûs-omes po m’ lu råyî dès brèsses.
Sicrît e moes d' djulete 2024