Come dj’ end a sovint cåzé, dins m’ payis del vå del Simwès, on n’ dit nén « amon nozôtes » mins « tchû nous ».
El viyaedje del famile di m’ mame, ou çki dj’ a veu l’ djoû ossu, i s’ lome « El Foret ». Les djins sont des Forijhots et les comeres des Forijhotes. Di tot tins, on-z a dit k’ les cis ki dmorént ladlé estént des erirés. C’ est ene sacwè k’ est cnoxhowe pattavå. I gn a bråmint des flåwes po s’ fote des Forijhots. Li Singlé (Gaston Lucy) end a scrît pus d’ ene.
Portant, li Gaston esteut todi binåjhe di vni aL Foret, pask’ il inméve bén m’ grand-pere. Les deus omes avént mo do plaijhi a cåzer eshonne. Il est vraiy k’ i racuzinént : li mere do Singlé, k’ esteut ene Mårtén, esteut l’ matante di m’ grand-pere.
El Gaston vneut todi tchû nos a mobilete. Nosse mere n’ esteut nén continne d’ el vey ariver, pask’ il esteut todi « niche come on vî veråt », dijheut ele. El Singlé saveut bén k’ nosse mere esteut araedjeye cwand i vneut. Po l’ fé assoti cwand i nd aveut l’ misse, il aléve pixhî conte li meur del måjhon.
Mins mi, dji l’ inméve bén, l’ Gaston. C’ esteut on plaijhi ki d’ l’ oyî cåzer nosse patwès et raconter ses viyès fåves. I djheut todi ki, si l’ Djule Cezår n’ åreut nén yeu wangnî disconte des Gålwès, tolmonde åreut cåzé l’ walon.[1]
Dji n’ sai pocwè, mins l’ Gaston m’ a dné deus cayés avou ses scrijhaedjes. Dji les a co. C’ est on bea sovni.
Mins l’ Singlé ni s’ trompéve nén. El viyaedje d’ El Foret esteut bén eriré. Dj’ a sovnance ki, cwand dj’ esteu djonne, i gn aveut pont di sclairixhaedje publik. Djusse kékes loumires par ci par la po loumer kékes bokets d’ voye. Cwand c’ esteut l’ nuteye, i fjheut noer come dins on trô. Cwand i fjheut djoû, c’ esteut l’ moumint do vey des ansinîs dvant les ouxhs des måjhons. I gn aveut do purin ki coreut so les voyes. Et i faleut bén waitî eyu çk’ on meteut ses pîs, po n’ nén aler roter dins ene flate di vatche. Dji doe dire ki, dins ces anêyes la ‒ viè 1960 ‒ les voyes do viyaedje n’ estént nén co tårmakêyes. C’ esteut des tchmins d’ pires, avou des trôs d’ tos les costés, et des poyes ki s’ acovissént ddins. Il est vraiy k’ i gn aveut ki cwate otos po tot l’ viyaedje. C’ esteut l’ cene do curé, do mwaisse di scole, del comere do telefone, et d’ on tchômeu ki vikéve e-n estant pexheu. Nolu n’ saveut comint çk’ i fjheut po s’ payî ene oto.
Et pu, kékes anêyes pus tård, gn a yeu les « ptits rebanaedjes » [pré-fusions] des comenes. El Foret a fwait pårteye di Vresse. Li viyaedje a divnou pus modiene. Asteure, il est rindjî dins les pus beas viyaedjes del Waloneye. Et, dins Grand Vresse d’ asteure, c’ est l’ viyaedje ki les måjhons s’ î vindèt l’ pus tchir.