Coumme dj’a n’ai souvint causé, m’payïs natal èst l’vallée d’la Smois, dou costé d’Bouyon. L’villadj’ de m’famille matèrnèle, mais û qu’ dj’ai vu l’djou ossi, s’loum’ L’Forêt. Lès djins sant dès Forijots, è lès couméres sant dès Forijotes. De tout timps, on è dit qu’ lès cîs qui d’mèrant la-dlé sant dès arrièrés, è c’è èn’ sakwè qui è connue pa t’avau. I gn’è bramin dès flauwes qui s’mokant dès Forijots. Le Singlé an’ è scrit pë d’ène. Mais l’Gaston Lucy astot toudi bin binauje de v’ni à L’Forêt pasqu’il aimot bin m’grand-pére. Lès deux hoummes avint fwoirt dou plaiji a causer assan.ne. Il è vrai qu’i racoujinant. La mére dou Singlé, qui astot ène Martin, astot la tante de m’grand-pére. L’Gaston v’not toudi tchu nous a mobilette. Ma mére n’astot nin continte deu l’wèr arriver pasqu’il astot toudi niche coumm’ in vî vèra, dijot-èlle. L’Singlé savot bin qui l’a fjot arradji. Pou la rind’ folle, quand il en sentot l’envie, i s’an allot pichî cont’ le mër de l’mwaujon. Mais mi, dje l’aimos bin l’Gaston. C’astot in plaiji que d’l’oyï causé nosse patwè è d’rasconter sès vîes flauwes. I djot toudi que si l’Jules César n’avot nin gagni cont’lès Gaulois, tout l’mond’ aurot causé l’wallon. Dje n’sais nin pou quwè, mais l’Gaston m’è dounné deux cayès avë sès scrisadjes. Dje lès ai co. C’è in bé souvnîr.
Mais l’Singlé ne s’trompot nin. L’villadj’ de L’Forêt astot bin arrièré. Dj’ai sovnance que quand dj’astos djaune, i gn’avot pon d’èclêradje public. I gn’avot que quéques leumîres pou scléri totes lès voyes. Quand c’astot la neutie, i fjot nwâr coumme dins in trau. Quand i fjot djou, c’astot l’moumin d’veye dès ensinies d’vant lès heutch’s dès mwaujons. I gn’avot du purin qui coulot seu lès voyes, è i fallot co s’an’ aller sins mette lès pîs dins lès flates dès vatches. Dje dos dire que dins cès années-là, vers 1960, lès voyes du villadje n’astint nin co macadamisées. C’astot dès tchmins d’pîres avë dès traus d’tos lès costés, è dès pouyes qui s’dandinant d’dins. Il è vrai qu’in’ gn’avot que quat’ autos pou tout l’villadje. C’astint les cîes du ceuré, du mwaisse de scole, de la dame du téléphone è d’in tchômeu qui viquot an’éstant pêcheu. Nolu n’savot coummint i fwajot pou s’payï èn’ auto.
È pî, quéques années pë taurd, sant vnës lès ptites « fusions » dès commënes. L’Forêt è fwait paurtie de Vresse. Le villadje èst devnë pë moderne. Asteur il èst randji dins lès pë bés villadjes de Wallonie, è de toute le commëne de Vresse, c’èst devnë l’cî û qu’lès mwaujons s’vendint le pe chér.