Pa l’ rowe cabouyeye, padrî cwate sipès tchvås d’ cinse, li longou tchår ås schåles avancixheut, fortcherdjî d’ meubes, d’ ahesses, et d’ vizreyes.
Al fene copete do moennaedje, ene comere, si gros drî nitchî dins ene grigneuse payasse etur les cwate pîs d’ ene tåve e l’ air, seréve conte leye, come des efants, deus posteures dorêyes so leus årteas come so leu tiesse.
Tchaeke bouye coschoyeut les aessis dins leu moyoû et nosse djin è tronnéve a grands côps, pinsant todi vey l’ Aviedje et sint Antoenne s’ acsegnî didins s’ schô.
L’ ome shuveut padrî l’ tchår. On tchenea dins ene mwin et l’ ôte todi presse a-z apicî l’ mecanike, i rotéve, les ouys ataetchîs al coide ki ractineut tot l’ bazår. Ça fwait k’ tenawete, si tiesse balancive come li resse, d’ on costé adon d’ l’ ôte.
Et l’ ome sondjive…
Dispoy a prandjire, i rote insi. C’ est po l’ bén d’ ses efants k’ i vént dmorer a Nameur. Mins, tolminme, cwiter s’ viyaedje cwand on-z î a vnou å monde, k’ on-z î a cnoxhou s’ feme, travayî, elevé si ptite famile, k’ on-z î a yeu totes ses djoyes, totes ses poennes… et po vni ewou… ?
« Ça clintche do costé k’ ça vout tchaire, don, cinsî ?
‒ Oyi, m’ fi.
‒ La ene djournêye, don ?
‒ Oyi ça.
‒ Si dj’ esteu d’ vos, la, dji rtinkeyreu l’ coide.
‒ Nén dandjî, ça n’ pout må.
‒ O ! pout må, pout må… Pout-må a tcheyou l’ dirî dins l’ aiwe, cinsî. Djel voe co. Waitîz, vosse feme va vni al valêye, don, cinsresse ? Hû hôw, Bayård ! Fijhoz les tårdjî ene miete, dji saetchrè l’ årmwere par ci. Atindoz, nos rtinkeyrans l’ coide… hôw, Bayård !
‒ Nén les poennes, nos arivans.
‒ Come vos vloz. Mins, cinsî, vos alez dire ki dj’ so curieus : vos vnoz ddja did lon insi ?
‒ Dal Grosse Sipene.
‒ O ! no d’ totoute ! Ça n’ mi rgårdêye nén, mins vos alez lon ?
‒ La pus lon, å coron del rowe.
‒ Nos n’ avans pus k’ ene pixheye dabôrd. Et vos vnoz dmorer par ci ?
‒ Oyi, å gros blanc bastimint ki rawaite dissu Mouze di l’ ôte costé.
‒ Emon Lagaesse ?
‒ Tot djusse !
‒ E-n efet, gn aveut on cwårtî a louwer.
‒ Oyi, å prumî.
‒ Tin don, mins vos seroz bén la; on vraiy paradis ; i gn a l’ pus viye di mes sours ki dmeure so l’ minme pas d’ grés… Hû hôw, Bayård!… hôw!… Vo nos î la, cinsî… Dischindoz, madame… Par ci, wai… Dinez m’ Toenne et Mareye. Tinoz vos al coide. La… Tinoz, boutez les posteures å dbout do colidôr, dji les montrè ttaleure.
‒ Mins, dit-st i l’ viyaedjwès, nos frans bén tot seus, savoz. Merci.
‒ Taijhoz vos, don, cinsî ! Dji m’ va bouter tos les canteas al valêye. Adon, tant k’ nos î srans, nos distchedjrans l’ resse et l’ tcheron serè totshûte clair. Epwis nos montrans tot l’ bazår.
‒ Merci tot d’ bon, alons, m’ fi », dit-st ele li cinsresse.
Mins l’ coide esteut dedja disnukeye, saetcheye et rôlêye. Et l’ sarazin gripéve et lancive tot åtoû do tchår.
– Alez, cinsî ! purdoz l’ årmwere po les pîs. Gåre, cinsresse !
‒ Mins l’ tcheron m’ va aidî, savoz !
‒ Et ses tchvås don, cinsî ? Il est tins s’ i vout esse ralé ådjourdu. I gn a å mwins cwate grossès eures di d’ ci al Grosse Sipene. Alons, purdoz l’ pa les pîs ; ça irè tot seu ; vos n’ åroz cåzu rén. Et vos, nosse dame, i n’ tént k’ a vos d’ monter les ptitès ahesses. Purdoz les tote gnognotès afwaires la, po n’ vos nén nåjhi. Gn a nén k’ troes dgrés, savoz, e l’ veye ! Après, si vos vloz, vos montroz on xhame ou deus : serè todi ostant d’ fwait. »
Et i vos ratchawtéve tot ça, tot distcherdjant l’ moennaedje. Et s’ linwe n’ arestéve nén, nén d’ pus k’ ses djambes.
‒ Tinoz, cinsî, vo l’ la djustumint, wai, l’ ome di m’ sour. Il est bén tcheyou. Hê, Tchåle ! vén dner on côp d’ mwin a t’ novea vijhén.
‒ A ! cinsî ! C’ est vos ki vént dmorer dlé nos ? Bén, vos seroz bén vaici. Oyi, ripoizez vos ene miete. Gusse, cwè çk’ on monte ? Li rsôrt ? Bon, dmeure padrî, dj’ irè padvant. Nos estans abitouwés, veyoz. Oyi, vos seroz bén : li grande air di Mouze, l’ aiwe a troes ascoxheyes, des åjheyès montêyes. Vos vieroz ki vs seroz bén ! » Et l’ pôve viyaedjwès, ki sondjive ki l’ vuwe n’ esteut waire si bele, l’ air si boune et l’ aiwe si près k’ vaila, a stî mågré li foirci d’ leyî fé les deus soçons. C’ e-st a poenne s’ i s’ a dvou bouter al coide po saetchî, tot saizi, pa l’ finiesse, li viye dresse di tchinne ki n’ vleut nén passer pa les åjheyès montêyes.
Asteure, c’ esteut fini.
Les deus beas-frés ratindént dissu l’ pas d’ grés. Et, drî l’ ouxh, li cinsî dmandéve a s’ feme :
« Cwè çk’ i lzî fåt dner ?
‒ Payîz lzî on bon vere.
‒ Pinsez k’ i seront contins insi ?
‒ Pocwè nén, fô mvé ! Est ç’ vos k’ a dmandé leu côp d’ mwin ?
‒ C’ est l’ vraiy. »
Et l’ viyaedjwès arive so l’ pas d’ grés.
« Comint n’ intrez nén, don ? Dji so contin k’ tot ça est fwait. Dji vos rmerceye bråmint des côps. Nos alans boere on bon vere asteure.
‒ Merci, cinsî.
‒ Siya, ô !
‒ Non, merci tot d’ bon, nos n’ bevans nén, ni onk ni l’ ôte.
‒ Vloz sayî on bon cigåre dabôrd.
‒ Merci, nos n’ foumans nén non pus, ni onk ni l’ ôte.
‒ Vos n’ avoz nén travayî po rén portant! »
Et i vout come po bouter troes doets e l’ potche di s’ djilet.
« Dinez deus francs, ô, cinsî, et serè bon insi, hin, Tchåle ? dit-st i l’ Gusse.
‒ Oyi, etur vijhéns, dit-st i l’ Tchåle… avou cwate francs po nos deus, vos seroz clairs, alons. »
K’ åreut i fwait, l’ pôve viyaedjwès ?
Il a payî.
Et deus munutes après, les deus beas-frés moussént al prumire tchapele po-z e tchessî ene.