Pa l’reuwe cabouyîye, pa-drî quate sipès tch’faus d’cinse, li longu tchaur a chaules avanciheûve fortchèrdjî d’meûbes, d’ayèsses, èt d’vîzerîyes.
Al fine copète do mwinnadje, one comére, si gros d’drî nichî dins one grigneûse payasse ètur lès quate pîs d’one tauve è l’air, sèreûve conte lèye, come dès-èfants, deûs postûres doréyes su leûs-ôrtias come su leû tièsse.
Chaque boye [2] cochoyeûve lès-assis dins leû mouyou èt nosse djint è tronneûve a grands côps, pinsant todi vôy l’Aviérje èt saint-Antwinne s’ac’sègnî didins s’choû.
L’ome sûveûve pa-drî l’tchaur. On tchinnia dins one mwin èt l’ôte todis près′ a-z-apici l’mècanique, i roteûve, lès-oûy atatchîs al cwade qui rac’tineûve tot l’bazâr. Ça fait qu’tènawète si tièsse balançeûve come li rèsse, d’on costé adon d’l’ôte.
Et l’ome sondjeûve…
Dispeûy a prandjêre, i rote ainsi. C’èst po l’bin d’sès-èfants qu’i vint d’mèrer a Nameur. Mins, tot l’minme, quiter s’viladje quand on-z-î a v’nu au monde, qu’on-z-î a conu s’feume, travayî, èlèvé si p’tite famile, qu’on-z-î a yeû totes sès djôyes, totes sès pwinnes… èt po v’nu èwou… ?
« Ça clince do costé qu’ça vout tchêr, don, cinsî ?
‒ Oyi, m’fi.
‒ La one djournéye, don ?
‒ Oyi ça.
Oyi ça.
‒ Si dj’èsteûve di vos, la, dji r’tinkîyereûve li cwade.
‒ Nin dandjî, ça n’pout mau.
‒ O ! pout mau ‒ pout mau‒ « Pout-mau a tchèyu l’derrière dans l’eau », cinsî; djel vwè co… Wêtîz, vosse feume va v’nu al valéye, don, cinserèsse ?… Yu-auwe, Bayârd !… Fioz lès taurdjî one miète, dji satch’rè l’armwêre pâr ci. Atindoz, nos r’tinkîyerans l’cwade… Auwe, Bayârd!…
‒ Nin lès pwinnes, nos-arivans.
‒ Come vos v’loz… Mins, cinsî, vos-alez dîre qui dj’ so curieûs : vos v’noz d’dja di d’lon ainsi ?
‒ D’al Grosse Sipène.
‒ O ! nom d’tot-ute !… Ça n’mi r’gârde nin, mins vos-alez lon ?
‒ La pus lon, au coron dèl reuwe.
‒ Nos n’avans pus qu’one pichîye d’abôrd. Et vos v’noz d’mèrer pâr ci ?
‒ Oyi, au gros blanc batumint qui rawête dissu Moûse di l’ôte costé.
‒ Emon Lagasse ?
‒ Tot djusse !
‒ An èfet, gn-aveûve on quartier a louwer.
‒ Oyi, au prumî.
‒ Tin don, mins vos sèroz bin la; on vrê paradis ; i gn-a l’pus vîye di mès soûs qui d’meûre su l’minme palier… Yu-auwe, Bayârd!… Auwe!… Nos-î v’la, cinsî… Ditchindoz, madame… Pâr ci, wez… Donez-m’ Twinne èt Marîye. Tinoz-vos al cwade. Là… Tènoz, boutez lès postûres au d’bout do colidôr, dji lès mont’rè t’t-a l’eûre.
‒ Mins, dist-i l’viladjwès, nos f’rans bin tot seûs, savoz? Mèrci.
‒ Taijoz-vos, don, cinsî; dji m’va bouter tos lès can’tias al valèye; adon, tant qu’nos-î sèrans, nos distchèdj’rans l’rèsse èt l’tchèron sèrè tot d’swîte clér. Et pwis nos mont’rans tot l’bazâr.
‒ Mèrci tot d’bon, alons m’fi », dist-èle li cinserèsse.
Mins l’cwade èsteûve dèdja disnukiéye, satchîye èt rôléye. Et l’sarazin gripeûve èt lanceûve tot autoû do tchaur.
- Alêz, cinsî ! purdoz l’armwêre po lès pîs. Gâre, cinserèsse !
‒ Mins l’tchèron va m’aîdî, savoz !
‒ Et sès tch’faus don, cinsî ? Il èst timps s’i vout yèsse ralé audjourdu. I-gn-a au mwins quate grossès-eûres di d’ci al Grosse Sipène. Alons, purdoz-l’ pa lès pîs, ça îrè tot seû, vos n’auroz cauzu rin. Et vos, nosse dame, i n’tint qu’a vos d’monter lès p’titès-ayèsses. Purdoz lès totes gnongnontès-afaires la, po n’vos nin nauji. Gn’a nin qu’trwès d’grés, savoz, èl vile !… Après, si vos v’loz, vos mont’roz on chame ou deûs : sèrè todi ostant d’fait. »
Et i vos ratchaw’teûve tot ça, tot distchèrdjant l’minnadje. Et s’linwe n’arèteûve nin, nin d’pus qu’sès djambes.
‒ Tènoz, cinsî, vo-l’-la djustumint, wez, l’ome di m’soû !… Il èst bin tchèyu… Hê, Châles! vin d’ner on côp d’mwin à t’novia vwèzin.
‒ A! cinsî ! C’èst vos qui vint d’mèrer d’lé nos ? Bè, vos sèroz bin vêci… Oyi, ripwazez-vos one miète… Gusse, qu’èst-ce qu’on monte ? Li r’ssôrt ? Bon, d’meûre padrî, dj’îrè pa d’vant. Nos-èstans abutuwés, vèyoz… Oyi, vos sèroz bin : li grande air di Moûse, l’êwe a trwès-ascauchîyes, dès-aujîyès montéyes. Vos vwèroz qui v’sèroz bin ! » Et l’pôve viladjwès, qui sondjeûve qui l’vuwe n’èsteûve wêre si bèle, l’air si bone èt l’êwe si près qu’vêla, a stî maugré li fwârci d’lèyî fé lès deûs soçons. C’è-st-a pwinne s’il a d’vu s’bouter al cwade po satchî, tot saisi, pa l’fènièsse, li vîye drèsse di tchinne qui n’v’leûve nin passer pa lès-aujîyès montéyes.
Asteûre, c’esteûve fini.
Lès deûs bias-fréres ratindin-n’ dissu l’palier. Et, drî l’uche, li cinsî d’mandeûve a s’feume :
« Qu’èst-ce qu’i faut l’zeû doner ?
‒ Payîz l’zeû on bon vêre.
‒ Pinsez qu’is sèront contints ainsi ?
‒ Poqwè nin, fô m’vé ! Est-ce vos qu’a d’mandé leû côp d’mwin?
‒ C’èst l’vrê… »
Et l’viladjwès arive su l’palier.
« Comint n’intrez nin don ? Dji so contint qu’tot ça èst faît. Dji vos r’mèrci branmint dès côps. Nos-alans bwâre on bon vêre asteûre.
‒ Mèrci, cinsî.
‒ Siya, o!
‒ Non, mèrci tot d’bon, nos n’bèvans nin, ni onk ni l’ôte.
‒ V’loz sayî on bon cigâre d’abôrd.
‒ Mèrci, nos n’fumans nin non pus ni onk ni l’ôte.
- Vos n’avoz nin travayî po rin portant! »
Et i vout come po bouter trwès dwèts èl potche di s’djîlèt.
« Donez deûs francs, o, cinsî ! èt sèrè bon ainsi, in, Châles ? dist-i l’Gusse.
‒ Oyi, ètur vwèzins, dist-i l’Châles… avou quate francs po nos deûs, vos sèroz clérs, alons. »
Qu’aureûve-t-i faît, l’pôve viladjwès ?
Il a payî.
Et deûs munutes après, les deûs bias-fréres moussin-n’ al prumêre tchapèle po-z-è cassî one…
Ci boket ci aveut yeu l' 3inme pris a ene bate di scrijhaedjes del SLLW di 1921, ey esse metou dins l' BSLLW tôme 60; i fourit replaidî dins les minmes Cayés walons, avou kékes pitits candjmints e limero 2/1958, pu e limero 4/2011