Sèm'di
Vola co 'ne fèye sèm'di rim'nou :
po hover, Nanète s'aprèstêye.
Sès deûs mantches sont dèdja r'trossêyes
on veût r'glati sès brès' tot nous.
Li pus' a sètch sèrè mètou!
Oûy, po sûr qui l' pompe dîrè l' vrêye !
Vola co 'ne fèye sèm'di rim'nou :
po hover, Nanète s'aprèstêye.
Li ramon frote come on pièrdou
so lès pôvès pires di pavêye,
qui d'vèt dîre inte zèles : « Binamêye !
Quéle arèdje, bon Diu! qué sam'rou !
Vola co 'ne fèye sèm'di rim'nou! »
Note Wikisourd
Dins « Ombions al pene », riprins dins « Li pan dè Bon Diu » (Recueil complet des poèmes wallons de Henri Simon, coleccion « Nos dialectes » l° 4, Vaillant-Carmanne, 1935, p. 49, pu co rprins dins « Petite anthologie liégeoise » da Maurice Delbouille, 1950, p. 52.