Dji d’mère dins one vile èwou qu’i-gn-a pus qu’ dès dwârmaus. Quand l’ dêrène fabrique à sèré, lès-ovrîs ont bin mostré qu’i n’èstîn’ nin binauje. Il ont apicî l’ grand maîsse èt saquants pèsants què l’ sotnîn’.
Chîj-eûres pus taurd, lès tèlèvisions ont filmé quand il ont stî r’lachî.
Mi-y-ome èsteût rèsponsâbe di l’ètêrtinance dès machines èt dès canetias. Il aveû-st-atrapé l’ cancêr dès ouyeûs. On l’a opèré au mwès d’octôbe. Il a moru li quatôze di janvier. Li lète avou s’ dêrin compte m’a stî r’mètouwe li lèd’dimwin di s’-t-ètêremint. Il ont profité di s’ mwârt po n’ pont-z-awè d’alocâcions à lî d’ner, adon qu’ tos sès plankèts ènn’avîn’ riçu.
Totes lès-usènes on pèté au diâle. I n’ dimèreut pus qu’ leûs nwêrès carcasses drèssîyes come dès sqèlètes. Li vile a comincî à croufyî. Saquants-ovrîs ont bin v’lu lès sûre et r’djonde leûs machines. Dès-ôtes ont r’çu dès scoladjes, tot jusse ci qu’ faleûve po-z-awè drwèt d’ fé dè l’ baraque. Lès pus vîs, on leûzi a d’né l’ pinsion d’vant l’âdje.
Come tortos aviè cès djoûs là, dj’a stî trin.ner dins l’ fabrique. Il avîn’ lèyî là dès dinréyes dins l’ cantine dès-ovrîs, bwèsses di lègumes, cafeu, suke, bocaus d’ côrnichons dès frûts à l’ sirôpe. Tot ça a disparètu d’ssu deûs djoûs. Dj’a zwèpé l’ fastrou dè l’ burô di m’-y-ome, si lampe, èt s’ machine à scrîre, qu’èrènit à l’ cauve.
Dissu dîj-ans, i-gn-a d’pus quinze ovris qu’ont faît maleûr di leû cwârp. Dj’a p’lu veûy leû portait dins l’ gazète. Combin ènn’a-t-i yeû ? On n’ lès-a jamais compté ! Branmint d’s-ôtes ont moru d’ misére à fwace di n’ rin fé èt ravaler leû fwin. Quand on n’ trove pus d’ovradje, lès djins vos pudenut po l’ cia qu’ènn’èst lès causes. On vos r’waîte di d’truviès, vos n’ wasoz pus mostrer vosse mawe, ni vos-amusemints. I vos faut viker au rastrindu.
Dipôy adon, l’ timps à r’clôyu lès-ouys dès dêrins qui vikîn’ co. Leûs-èfants sâyenut d’ viker avou ç’ qu’on l’zeû prusinte, trois mwès véci, chî mwès vélà. À paurt lès nawes qu’on trové pus aujîy di viker à l’ maîgue crosse dè l’ CPAS qui boute tchêr èt vilin por zèls. I n’âront jamaîs on twèt. Nin co l’ drwèt d’ viker dins lès grandès maujones dès maîsses ; èle tounenut à rin, ça costèyerot trop tchêr à lès r’taper. Dj’inme co mia mi p’tite cayute di bwès dins l’ fond dè l’ djârdin.
Dji vwèreû voltî d’awè assez di liârds po m’ payî dè l’ boune eûréye, dès novèlès loques, fé on voyadje au solia èwou, qui dj’ n’a jamais stî. Dji sondje co bin qui dj’ m’âreu d’vu r’mète à min.nadje, awè on-èfant. S’i n’ m’ arive nin bin rade one saqwè d’ plaîjant èt dji n’ènn’a pont d’idéye, dji pourè dîre sins m’abûsé qui l’ bouneûr n’ègzistéye nin èt qu’i n’ m’a jamaîs vèyu voltî.