Là d’djà 53 ans du-d-ça
– Èt si vous nous racontrîz lu dîje du mêy 1940 (dîje nûf çant quatrante), ô ?
– Â ! bin, lu dîje du mêy 1940, quand dj’ nous-ans ravèyé au matin, on z-oyot in brut d’avion formidâbe. Bèrnadète su lève; èle wête à l’ vite; èt là qu’èle dit : « wête in pô, don, di-st-èle, dju garanti qu’ c’èst la guère. I gn-è dès choses partout; i gn-è dès nouwadjes partout ou cièl. »
Ça fwèt qu’ dju m’ lève bin vite èt dju dis : « Ôh bin têje-tu! C’èst nin vrê. »
Mês du côp, la T.S.F. clamot partout : Ôh! La guère èst dèclârêye; lès-Almands ont dâré dins la Bèlgique; la gare du J’mèle è-st-a feû, hin. Èt Julîe astot vôye trêre; èt èle nu v’lot rin crwâre du tout ça, lèye.
– Qu’èst-ç’ quu v’s-onz fwêt, d’abôrd, du l’ matinêye pou v’s-ocuper ?
– Âh bin, du l’ matinêye, tu sé bin, on z-alot d’ène place è l’ôte, hin. On courot mon Nonke Zidôre choûter l’ posse pou vèy si on n’ saurot nin ène nouvèle û deûs. Pîs on z-è c’mincé à mobiliser lès djon.nes djins. Lès jandârmes apwartint dès papîs. Èt pîs ç’ côp-là on z-è colé dès-afitches partout, quu tout l’ monde duvot ’nn’ aler, lès djon.nes du 16 à 35 ans. Èt ça fwèt qu’ tous lès-omes n-ont ’nn’ alé come ça, à fwêt, là. Ôh i gn-avot dès camions qui lès mon.nint à dèstinâcion. Èt pîs ç’ côp-là, du l’ vèsprêye, vè quate cinq eûres, dj’ans c’mincé à vèy dès Spayis′.
– ??
– Ây, dès Français; … dès mitan nwârs, là, dès Sènègalais,… avu dès p’tits tch’vaus. Èt is s’instalint in pô partout. I gn-avot après l’ Maguin, là, dé la Grosse Hèstrèle — c’èst du-d-là qu’ dju m’ souvins l’ mî, mi. Èt ça fwèt qu’ vè la nut′, il ont putot monté vè la Bâriére du Transine. Èt laddé, il astint instalés in pô partout. Èt il ont passé quausu la nut′. Èt pîs on z-oyot lès dètonâcions. On z-oyot lès ponts d’ Pwès qui sôtint; lu pont d’ Libraumont, là; lu grand pont du R’cogne. Èt à ç’ moumint-là, Châle nous-è rarivé, avu dès p’tites coumères d’Anwêde, là.
– Èt vous-onz co passé la première nut′ à R’dû, insi ?
– Ây, mês on n’è wêre dwârmu. On s’ rulèvot tout l’ timps. On z-oyot dès bruts d’avion. Èt ène sôrte û l’ôte tout d’in côp, à drète èt à gautche. Èt lu sèmedi au matin, vè wit-eûres, Châle n-ènn′ alé avu lès dêrins du R’dû, d’abôrd. Is n-ont ‘nn’ alé su Quièvrin.
Èt, pîs ç’ côp-là, on z-astot à s’ consulter: v’lans-dj’ n-ènn′ aler ? V’lans-dj’ dumèru? Papa v’lot d’ toutes fwâces dumèru, li. Èt nous-ôtes, bin, savèz bin, on n’astot nin trop chûr. Èt i gn-avot dès cés qui v’lint ‘nn′ aler èt dès-ôtes v’lint d’mèru là. Ça fwèt qu’ tout l’ min.me, vè quate cinq eûres, lu sèmedi du l’ vèsprêye, dju nous-ans dècidé à ‘nn′ aler. Dj’ans atèlé l’ bègnon. Èt pîs ç’ côp-là, dj’ans pris quélques cayèts, là… quéques valîses avu quéques cayèts qu’on n-aurot dandjî. Èt pîs dj’ans pris nosse biciclète, nous-ôtes.
– Z-onz pris Minmin.ne ossi, dj’ crwâs ?
– Ây, dj’ans pris Minmin.ne avu nous-ôtes, pace qu’èle v’lot ‘nn′ aler avu nous-ôtes. Èt pîs dju nous-ans mètu an route…
Clothilde Delaite est interviewée par Pierre-Joseph Dosimont, en 1949, pour un enregistrement sur disque ("Baptême gramphonique"). Une copie cassette est disponible au CIDWEL.
La présente transcription, très légèrement retouchée, a été réalisée par Lucien Mahin (Louline vôye).
Les passionnés de wallon intéressés également par cette page d’histoire trouveront de nombreux témoignages en wallon dans le livre de Jean-Jacques Gaziaux Souvenirs de guerres au Pays de Jodoigne. Louvain-la-Neuve, 1990.
eplaidî dins l' coirnêye « Quand djè n' saîs rin, djè m' tâs ! » avou ene anonce e francès do parexhaedje do tôme II d' Ène bauke su lès bwès d’ l’Ârdène, shuvant èn acoird passé avou Lucien Somme, li responsåve des scrijhaedjes e walon po l' gazete « Vers l'Avenir ».