Bénrade co des cint meyes moirts so nosse consyince
Gn a lanawaire ene accion pol Darfour k’ a stî cminceye pa Destexhe, Isabelle Durant eyet des ôtes politikîs : Pierre Galand, Christian Brotcorne, Josy Dubié, François Roelants du Vivier, Sabine de Bethune, Lionel Vandenberghe et Jean Cornil.
Li messaedje a-st avnou sol Djåspinreye "Toudi", pal voye d’ èn emile do senateur Destexhe (prononcîz Dèstèhy avou èn ixh-låte).
Ci-cial, mågré s’ no pår walon, n’ est nén co si bén veyou des Walons. Dispu k’ il aveut vnou fé l’ gugusse a Nameur, et discåzer l’ Walonreye (Rantoele l° 34), on s’ endè dmefiyreut voltî.
Mins les soçons ki sont-st avou lu, come Isabelle Durant et Josy Dubié, c’ est des djins comifåt, sapinse l’ André Dumoulin, on scrijheu dins nosse gazete.
Mins po dire li veur, …
C’ est adon ki dj’ a dit l’ minne, tot m’ rashiant so les rapoirtaedjes ki dj’ aveu veyou sol tchinne di tévé « El Djazira ».
Dj’ el dirè platezak : ci n’ est nén des letes et des metingues ki front bodjî ene sacwè å Darfour.
Les Soudanès, dji n’ les sotén nén po leu politike å Darfour. Mins i mostrèt tot s’ ricrestant çou k’ tos les peupes arabes pinsnut dispu k’ el bea Bush a stî mete li tchet dins les poyes e l’ Irak et dire k’ il î moennéve ene « Croejhåde » : cwand les « crustins » metèt leus pîs ene sadju, c’ est po s’ rinde mwaisse des moslimîs, et lzès spotchî.
Dispu ki l’ Urope a tourné l’ cou ås Palestinîs, pask’ il avént lomé on govienmint a leu-z idêye dins des eleccions pår democratikes, les peupes arabes loukèt l’ Urope come on ptit tchén des Estats Unis.
Sapinse a mi, dit-st i l’ sot, si vos estoz citweyin d’ on pays d’ Urope u des Estats Unis, vos n’ pôroz rén fé pol Soudan. A pårt bouter avou des soces di bénfjhance muzulmandes, les seules ki plèt aler låvå, po-z aswadjî les pôvès djins.
Dj’ a on soçon, Martial Ledecq, k’ a stî ovrer ladrî po "Medcéns sins Frontires". On l’ a cåzu fotou a l’ ouxh pask’ i dmandéve k’ on l’ leye di tote foice passer po schaper les djins. Mins el dimandéve dandjreus tot cåzant trop roed, trop grandiveuzmint por zels.
Li 18 di djanvî, li Rodje Croes anoncént ki tos les ovreus umanitaires alént cwiter l’ payis. Trop riskeus, por zels, minme s’ i n’ metèt pus ene croes come essegne, mins èn orandje lozindje.
Les Amerikins ont des royes a leus coines dins tos les payis arabes. Et l’ fô verat d’ Bush n’ a nén l’ air di stater : i vént d’ evoyî les Etiopyins ridisbrôler l’ Somaleye, co on côp dins èn adjinçna [schéma] la k’ c’ est des crustins ki vnèt ataker des Moslimîs. Et i continowe a fé do ronflant e l’ Irak.
A ! si l’ Urope åreut yeu shuvou l’ voye di l’ Almagne, del France eyet del coraedjeuse pitite Beldjike da Michel et Verhofstadt, å moumint d’ l’ abrocaedje des Amerloches e l’ Irak e 2001. Et continouwer a-z aidî les Palestinîs, minme avou on govienmint k’ ele ni voeyeut nén voltî. Et prinde des mzeures disconte d’ Israyel après l’ condanåcion på tribunå del Håye do Meur di l’ Apartheit k’ Israyel a basti.
Adon, Destexhe sereut motoit bén l’ bénvnou e Soudan.
sicrît li 19 di djanvî 2007