(prononçaedje neute)
C’ est Djan l’ bracnî des bwès d’ Rondu.
‘L a metou s’ vete nouve frake sor lu.
‘L a s’ fizik, del poure dins s’ tchena.
Vo l’ la k’ ascoxhe ; waitîz lu la !
So s’ longou nez, ‘l a ses berikes
po touwer l’ live d’ on côp d’ fizik.
Dins les foyes, nosse live s’ a metou.
Ttaleure, li bracnî srè djondou.
Come el solo lujheut d’ deus dobes,
vo l’ la hodé ; wai, la k’ i fote
si fizik so l’ yebe et si stind,
et s’ edoime dizo on sapén.
Ça fwait k’ nosse live a-st ene apinse.
‘L apice li fizik pu s’ rapinse
K’ i dvreut prinde les berikes ossu.
I fåt çk’ i fåt, sapinse a lu.
Come nosse live les berikes a pris,
les mete so s’ nez po vey groxhi.
Li bracnî s’ dispiete tot berlu
et voet k’ on va tirer sor lu.
Hay des guetes, a grandès hazêyes
et raler tot shuvant s’ passêye !
Li bracnî, purdant s’-n enondon
zoupele dins l’ pousse k’ est dé s’ måjhon.
Il esteut tins, ca l’ live d’ å lon,
tiréve ene cartoxhe po do bon.
Dins s’ coujhene, el feme do tchesseu
aveut rmetou l’ cocmwår sol feu
après s’ awè vudî ene djate
di cafè et do laecea d’ gade.
Ele vént båker padrî s’ finiesse,
voet l’ tåvlea, et lait tchaire les bresses.
Ès djate di cafè lyi a schipé.
So ene pire, li djate s’ a peté.
Mins l’ coyî, kî çki l’ a hapé ?
C’ est l’ djonne do live, por lu djouwer.