C’ est todi poenneus ki dj’ raconte
l’ istwere di Catrene ; c’ est ene honte !
On djoû k’ moman et nosse meskene
estént evoye après Transene,
elle esteut tote seule e l’ cassene,
nosse Catrene.
Il atome k’ ene boesse di brocales
esteut la, a mwin, dins l’ potale.
Mågré k’ moman aveut bén dit
k’ ele ni les aduze nén, todi,
ca elle åreut ene ratournêye,
ene boune petêye,
Catrene pinsa : « Come c’ est damadje !
Dji n’ pou må, dji n’ so nén såvadje.
Dji frè come moman dins s’ coujhene,
sins les esprinde al disgoviene. »
Poupousse et Minousse les deus tchets
veyèt les brocales ki blamèt.
I levèt leu pate et niawèt.
I mostrèt leus grawes et mancèt :
« Vos vs alez broûler, sote maraye !
Popa vos streyrè vos orayes. »
Mins nosse Catrene schoûte come ene hawe.
Ele n’ end a d’ keure d’ on tchet ki niawe.
« Waite come c’ est bea ene aloumete
ki s’ esprind, dit-st ele li tchîpete. »
Cwand les tchets ont veyou çoula,
il ont co niawté bén ådla.
« Vos vs alez rosti, sote maraye !
Popa vos streyrè vos orayes. »
Wai l' feu ki prind dins s' divantrin
pu dins ses cotes, a grand traeyin.
Ses mwins, ses cawetes sont-st a blame.
L' efant etir est dins les flames.
E veyant ça, les tchets rniawèt.
Po houkî les vijhéns, boerlèt :
« A mwin, a mwin ! L' efant rayixh.
Ele va blamer come del hårpixhe. »
Mins c' est trop tård, di nosse Catrene,
i n' dimeure pus k' on moncea d' cenes
et deus solés tapés al tere
come noste imådje bén vos l' mostere.
Minousse et Poupousse les deus tchets,
brèyèt a n' si saveur rawè.
Il ont metou ene ranse a leu cawe.
I tchoûlnut, drovant leu badjawe,
Tot xhorbant leus ouys d' on noret.
Leus låmes ont fwait tot on potet.