(prononçaedje coinrece
shuvant scrijhaedje)
Clovisse lu bracnî vint d’ pârti.
‘L è mètu sa nûve frake sur li.
‘L è s’ fizik, dul poûre dins s’ tchèna.
Vou l’ la k’ ascauje ; waitez l-lu la !
Su s’ longu nez, ‘l è ses bèrikes
pou touwer l’ lîve d’ in côp d’ fizik.
Dins les fouyes, nosse lîve s’ è mètu.
Ttaleûre, lu bracnî srè djondu.
Come lu solê loûjot d’ deûs doubes,
vou l’ la hodé ; wai, la k’ i foute
su fizik su l’ yêbe, et su stind,
èt s’ adwâme duzou in sapin.
Ça fwait k’ nosse live è ène apinse.
‘L apice lu fizik pî s’ rapinse
K’ i dvrot prinde les bèrikes ossi.
Il è don fwait come i l’ è dit.
Come nosse live, les bèrikes, è pris,
les met su s’ nez pou vey grochi.
Lu bracnî s’ duspiête tout saizi
du vey k’ on va tirer sur li.
Hay des guètes, a grandès hazêyes
èt raler a sîjant s’ passêye !
Lu bracnî, purdant s’-n alondon
zoupule dins l’ pwisse k’ est dé s’ maujon.
Il astot tins, ca l’ live d’ au lon,
tirot ène cartouche pou du bon.
Dins s’ cûjine, la fame du tchèsseû
avot rmetu l’ cocmwâr sul feû
après s’ awè voûdé ène jate
du cafè èt du lacê d’ gade.
Ele vint bauker padrî sa vite,
wèt l’ tauvlê, et rmousse ttossi vite.
Sa jate du cafè lî è chipé.
Su ène pîre, la jate s’ è spiyé.
Mais l’ coyî, kî çki l’ è hapé ?
C’ est l’ djonne du lîve, pour li djouwer.