C’ est toudi pon.neûs ku dj’ raconte
l’ istwâre du Catrine ; c’ e-st ène honte !
In djoûr ku moman èt l’ meskine
astint vôye du costé d’ Transine,
elle astot toute seûle al cassine,
Nosse Catrine.
Il atume k’ ène bwasse du brocales
astot la, a mwin, dins l’ potale.
Maugré k’ moman avot bin dit
k’ ele nu les aduze nin, toudi,
ca elle aurot ène ratournêye,
ène bone pètêye,
Catrine pinsa : « Come c’ est damadje !
Dju n’ pu mau, dju n’ su nin sauvadje.
Dju frê come moman al cûjine.
C’ est si bê a vey, ça m’ chagrine
du n’ nin fé kine. »
Poupousse èt Minousse les deûs tchets
Wèyèt les brocales ki blamèt.
I lvèt leû pate èt i gnâwèt.
I moustrèt leûs grawes èt man’cèt :
« Vous vs alez brûler, sote bwêcèle !
Papa vous strîrè vôs orèyes. »
Mês nosse Catrone choûte come ène hawe.
Èle n’ unn è d’ kère d’ in tchet ki gnâwe.
« Wête come c’ est bê ène alumète
ki s’ alume, dit-st èle la tchipète. »
Cwand les deûs tchets ont vèyu ça,
il ont co gnâwté bin audla.
« Vous vs alez rosti, sote bwêcèle !
Papa vous piçrè vôs machèles. »
Wê l' feû ki prind dins s' duvantrin
pî dins ses cotes, èt su pont d’ tins.
Ses mwins, ses cawètes sont-st a blame;
L' èfant ètîr est dins les flames.
A wèyant ça, les tchets rgnâwèt.
Pou houtcher les vèjins, bwâlèt :
« A mwin, a mwin ! L' èfant rayit.
Èle va blamer come du l’ aurpi. »
Mês c' est trop taurd, du nosse Catrène,
i n' dumeûre pus k' in moncê d' cènes
èt deûs solés tapés al tère
come noste imaudje bin vos l' mousture.
Minousse èt Poupousse les deûs tchets,
brèyèt a n' sawèr su rawèr.
Il ont ène ranse après leû cawe.
I tchûlèt, drovant leû badjawe,
èt rchoûrbant leûs ouys d' in moutchwè.
Leûs lârmes ont fwêt tout in potet.