Djean éié s’feumme Mardjoseuf, deux dgins d’Bournivau, avinne esté à Brusselles vîr l’Esposition.
Il avou d’jà bî ’n’quatraine d’heures qu’i stinneut là éié comme i-z-avinnent pris leu briquet avé ieuss éié qu’i ’stou approchant les twés heures dé l’après-deiner, Djean dit dainsi à s’feumme :
— I’ m’chenne qué d’coumminche à avwer scau mes dints : n’a-t-i pu rî dins l’musette ?
— Il a longtimps qu’elle est r’ploïée, m’fi !
— Nom des os ! Em’vinte plaque à m’dos ! Qu’est-ç’ qu’i vo chenne ? En’mindg’rinnes nî co bî n’pétite saquet ? No stons là passés t’t à l’heure d’lée n’baraque dé plantches avé in insègne comme el cienne Pantchou, d’su l’place dé Moustieux, même qu’i stou marqui Restaurant. Si no dallinnes vîr djusqu’à là ? No trouverrinnes put ette çu qu’i no faut.
— I’ n’ tî qu’à nous, dist-elle Mardjoseuf. Après tout, c’ est n’est ni pou in coup qu’on va su l’étranger qu’on n’dwet ni bî s’sougnî.
In tout d’visant, velza intré au grand Restaurant Mackensie.
— Pâr ci, dist-i’ Djean in satchant s’feumme pa s’cotte ; là n’tâbe qu’i’ n’a persône… faut cwére qu’on no rattindou, l’s assiettes sont d’jà miges !… À qui ç’ qu’on pâle hon douci ? Djé m’ va toudi d’mander à c’tilâle avé s’casaque dé pâqui… Hé la, m’fi ? — Monsieur désire…? — Qu’avez à mindgî, hon ? S’on pourrou là avwér in assiette dé soupe avé in boû boquet d’bouli, n’ saquet d’bî cras, là ! In boquet à l’tause no convérou fourt bî.
— Monsieur pourra choisir parmi les plats indiqués sur la carte.
In d’sant ça, l’garçon leu donne el cârte éié va tirer l’casaque d’in Monsieur qui v’nou d’rintrer.
— Commint, dist-i’ Djean tout saisi, il est marquî su ç’papî çi çu qu’il a à mindgi ?… In vérité ! Cré tas d’Brusselaires, i’ n’a qu’ieuss pou avwer tous plans pareies. Ç’qu’i’ vo chenne, hon Mardjoseuf, si no coumminch’rinnes pa in prix fixe ?
— Eh bî woye, assaïons toudi.
— Eh m’fi ! Donnez em’ pau deux prix fixe…
— Mais Monsieur, dist-i’ l’garçon qui n’arou jamais seu fer autrémint qué d’rire, prix fire n’est pas un plat. Cela signifie que chaque consommation se paie juste le prix indiqué sur la carte.
— Han ! Scusez !… Avez dé l’soupe, adon ?
— Certainement, Monsieur.
— Mais, dist-elle Mardjoseuf quand l’garçon a ieu sté voïe, est ç’ qu’i’ n’va nî v’nu r’prinde les deux godiches dé baptèmme qu’on a là layï su l’s assiettes ?
— Bî sotte, en’ v’ii nî pou qué ç’qué c’est fer : ravisez ç’Monsieur là…
— Han woye !
Éié là d’sus Djean éié Mardjoseuf ont sondji qu’i’ stinnent su leu trinte et un éié qu’ ça sârou dammatche dé spitter dé l’soupe ou bi dé l’sauce su leu belles loques, djustémint les ciennes qu’i n’mettont qué l’djou d’grandes Pâques éié l’dimanche dé leu ducasse.
Ça fait qu’il on pris chaque el serviette qu’astou su leu-n-assiete éié ils l’ont loïi à l’intour dé leu cou : i’ stinnent même fin propre avé, vos ari ieu dit deux pourchas avé leu tchénolle.
— Si les ciens d’l’hamia Choupère no virinnent dainsi à l’auberche au mitan d’tous ces Monsieurs ci, qu’est-c’ qu’i racont’rinnent, hon Mardjoseuf ?
Çu qu’c’est pour ça, disou-t-elle Mardjoseuf in grattant n’tatche dé soupe qu’elle avou fait sur s’serviette, çu qu’c’est pou ça dins les grandé villes comme on vique bî, hein Djean ? Tous ces gaïards là ça n’mindge qué rostis éié boulis éié c’est tous les djous au soleie.
— C’est ça étou qu’il ont l’pia d’leu visâtche t’aussi blanche qué du lait …Mais, à c’te heure qué nos avons ieu no soupe, no pourrinnes bî sûr el cârte. Wétonne em’pau… Potage. Qué c’ qu’i’ vo chenne ? Boutrinnes pou in potâge ?
— À vo gout, m’fi ; asprouvonnes toudi pou vîr.
— Appourtez chaque in potâge, dist-i’ Djean au garçon, éié n’vwéti nî à n’plotche.
El garçon qui vïou bî à qui ç’ qu’il avou à fer est voïe quer les potâges sins rî dire ; mais seul’mint in r’vénant dé l’ cugine i’ rïou co tout seu.
— Voilà M’sieur !
