I fwait sene avou s’ pate, ele li voet, eyet rade,
Elle desquin au galop po sognî m' camaeråde !
I drouve ès gueuye å lådje, i lyi mousse ès goyî.
Sol tins k’ i s' disbate k’ i s’ cotrouye,
Ele waite dins l’ trô avou deus ouys,
Co pus clair ki les cis d’ on tchat,
Ele s’ eva radmint rcwer l' oxhea !
Mins cwand elle a yeu fwait, elle a vlou esse payeye,
L’ Leu l’ waite a coine e djhant : « Bén vos riyoz ndo m’ feye !
« Bén vos radodinez ! paski come dji l’ etinds,
« Vo dvrîz esse bén continne
« Ki dj’ vos a leyî rsaetchî vo tiesse wôr di mes dints !
« Mins ç’ n’ est rin ! waitîz bén, di n’ nén rtchaire dins mes mwins !
« Paski, vos atraprîz ene fameuse rigodinne,
« Contez k’ vos pasrîz må vo tins !
— La dsu l’ Ciwagne, èn lyi a nén dmandé s’ resse,
— Elle a rade fotou l’ camp, e rastrindant ses fesses.
Vo veyoz bén Colas, k’ i n’ fåt nén oblidjî,
Les djins ki n’ ont nén d’ keure ! vos årîz bea ratinde,
I n’ vos l’ ervåront nén ! mins si l’ moumint s’ prezinte,
I n’ mancront nén leu côp po vos fé eraedjî.
El Liyon k’ atrape ès pile.
On mostréve so ’ne caricateure,
On djoû sol fôre po deus gros sôs,
On Liyon k’ atrapeut s’ dobleure,
Pa èn ome ki l’ tineut pa dzo !
