Ça vo mousse k’ on n’ doet nén todi s’ djudjî trop hôt,
K’ tot costé, kî ki ç’ fouxhe, doet waitî d’ tini s’ plaece,
N’ impôrte ès pôzucion, s’ rang, s’ fôrtune ou bén s’ classe ;
Si tot l’ monde fijheut insi, ça n’ ireut nén pus må.
El Leu eyet l’ Ciwagne.
On côp l’ borguimwaisse del Vile-Basse,
Dinéve on grand dinner, pol dimegne del dicåce !
Cwand il ont yeu boufé, on rascod les oxheas.
Po les taper sol rowe et ndè fé on moncea.
On Leu vént soucter ddins avou ’ne fwin d’ tos les diabes[1],
— « Vla ’ne råle fristouye, dit-st i, metans rade vinte a tabe[2] !
La dsu come on golafe, e golou k' il estét[3],
I stronnéve sins macher, tos les pu gros boukéts[4],
Mins vla come i mougnive abeye,
Il î aroke dins s’ goyî, èn oxhea, come ene djeye !
C’ esteut l’ ci d’ on boli ;
Mins l’ pus fotant por lu : c’ est k’ i n’ saveut criyî !
On djan-potaedje ou l’ ôte åreut bén fwait s’n afwaire,
Ou, èn araetcheu d’ dints, ttossu adroet k’ Prospere,
Mins i n’ pleut nén seulmint,
Po lyi cwer onk ou l’ ôte, criyî après l’ gamén.
Co bén astcheu por lu, i voet passer ’ne Cigogne[5],
Avou s’ betch co pus long k’ ene såcisse di Boulogne !
Elle aléve å raclot d’ Djilî !
