— L’ Araegne dit : « des cahoutes, i n’ m’ è fåt nén po rén !
— Mins creyant esse pus fene, el Gote,
Didins l’ måjhone, veyant todi l’ medcén,
Avou ’ne drouke ou d’ l’ ongant, ’ne siringue ou on papin,
Tchoezit l’ cahoute, eyet ’le va s’ fote,
So l’ årtea d’ on soyeu !
— E djhant, c’ est mi k’ a tcheu dsu l’ neu[1] !
Gn a pont d’ medcén droci po vni plaker s’n eplåte[2] !
Pont d’ medcén pol pôve k’ est malåde !
— Vla l’ Araegne dins l’ måjhone, ele s’ aclape å plantchî,
Ele fwait ’ne toele ås wezôs ! po ratinde ele s’ ashid,
Ene moxhe vént s’ fé prinde come ene sote !
Tot daléve bén ! vla k’ ele prind ’ne mote,
On cuzén, ’ne wesse et on picron ;
Mins vla l’ meskene ki vént, broushter avou s’ ramon !
A rvoere ès fricassêye eyet s’ toele k’ est si tene !
Ele ndè rfwait ene e s’ fotant del meskene !
Mis vla d’ cwè s’ fote el tiesse å meur :
Tot al pikete do djoû, ele vént avou ses broushes,
Eyet co po ç’ côp ci, il a ploû dsu les mouches[3] !
S’ ramon esteut ’ne miete trop deur !
L’ Araegne vént trover l’ Gote et lyi dmande : ké noveles ?
— Taijhe tu ! dj’ so bén cint côps, pus må moennêye ki ti !
« I m’ moenne finde des cous d’ åbe, dins l’ bos ou å corti,
« Et soyî des tchvirons, ou des clapes di couveles[4] !
Eyet dj’ nd a ene a mes coirdeles !
— Candjans, dit-st ele l’ Araegne, et rade tcheu on savtî,
Ele s’ aclape ou çki l’ broushe, n’ aveut ptete jamwais stî !
Al fén li vla a s’n åjhe !
Et l’ Gote s’ eva binåjhe,
Tchaire so les dognons d’ on curé !
Ki s’ meskene el sognive, come èn efant wasté,
Ele lyi fjheut des papins, et lyi stitchî s’ barete !
Et drola l’ Gote a stî, dorlotêye al doyete.
Pådje:Léon Bernus - Les faufes dè J. Lafontaine in patoès d’Chaleroèt, 1872.djvu/rif/63
Cisse pådje ci a stî coridjeye ey est l’ minme ki l’ sicanaedje.
