Les è vla so les spales, sol panse, sol dos do Rwè,
Ki les leye fé et ki s’ tént coe !
L' bon Diu nd a bén rade yeu stî lasse :
« Boutez on Rwè, djhént ele, ki s’ bodje e fijhant ’ne grimace. »
Il evoye on Héron avou s’ betch bén rawjhî !
Ki les årchele, les gobe, et les stronne a plaijhi !
Ça n’ leu daleut k' tot djusse ! ele cominçnut a braire.
— « L' bon Diu leu dit : waitîz d’ vos taire !
« Pocwè n’ avoz nén tnou vosse pitit govienmint ?
« Sins voleur vir on Rwè, po sayî do candjmint,
« Faleut l’ tini insi et prinde vo-n avizance,
« Cwand l' prumî k’ vos avîz est biesse a l’ ône di France !
« On Rwè c' est èn osti, ki vos n' conxhîz nén co !
« I våt mieu ki n' dijhe rén, k’ i n' bodje nén come el blo.
« A m’n ouy, tinoz çti-ci, té k' il est, sins rén dire,
« Si dj' vos nd evoye co onk, i srè ptete co pus pire. »
Wai, ç’ fåve ci mes efants, n’ a nén dandjî d’ moråle,
On voet tot d’ shûte çou k’ våt, tote el poûxhance Royåle.
L’ Ernåd eyet l’ Bok.
On côp gn aveut on Rnåd ki rvineut d’ Lamibuseau,
Avou on vî Bok noer, k’ aveut des coines so s’ tiesse,
Cwek’ il esteut ddja vî, il esteut co foirt biesse,
Mins s’ camaeråde esteut pus malén k’ on vexhåd !
