El tchén s’ aclape a s’ gaeye, et l’ Bierdjî prind s’ holete,
Lyi stitche el fier dins s’ vinte, brijhe el mantche so s’ hanete,
Cwek’ ki ç’ a a-st arivé etur Mons et l’ Pintcote[1],
Djhoz k’ c’ est ene rude luçon, po les sots et les sotes,
Po les djins ki fijhèt l’ fir, pask’ il ont èn abit,
Ki pasnut po ’ne sacwè et po awè d’ l’ esprit !
Stitchnut leu nez dins tot et di esse adroet ont l’ air,
Tot l’ sicret d’ leu-n esprit : c’ est d’ fé l’ moirt et di s’ taire !
Tant k’ i n’ shofelnut mot, i pasnut po maléns,
Mins s’ i drouvnut leu trape, c’ est arvoere les vijhéns.
Les Gurnouyes ki volnut on rwè.
Les Gurnouyes trop biesses ès lassént,
D’ bén viker dins leu Republike,
E breyant å bon Diu rclamént :
I leu-z evoye on Rwè ! come les ôtes, minme botike :
C’ esteut ’ne grosse soke di bos,
Dins l’ ri ki tchait d’ asto !
Trop simpes, come on-z a peu, d’ onk dit « grand persounaedje »,
Ele s’ evont s’ ermuchî dins leu trô d’ anairaedje !
Ele n’ oizént nén waitî d’ tot près,
L’ grosse soke k’ ele purdént po leu Rwè !
Rén k’ a l’ waitî ele nd ont ddja l’ vesse ;
Al fén gn a ene ki vude di s’ trô,
Les ôtes shuvnut..... Mins ké tablô !
Come i n’ bodje nén, ele sôtelnut so s’ tiesse !
- ↑ Pintcote purade ki Pintcosse po wårder l’ rimaedje
