Fijhoz do pwin d’ epice, ou bén des aloumetes,
Vos n’ contintroz personne ! On s’ fotrè d’ vos tot nete.
El Leu tourné a Bierdjî.
On Leu tchessî, porshût, pattavå tos les bos,
N’ estronnéve pus bråmint d’ Bedots !
On bea djoû dins s’ tiesse il edvinte,
On plan po spårgnî s’ pea, eyet po rimpli s’ vinte :
I s’ abiye a Bierdjî avou ’ne vesse di pilou,
Ene barete so s’n oraye, et ’ne marone di toele grijhe,
Des spès solés, ene bleuse tchimijhe,
Po s’ holete on baston, avou ’ne bourlote å dbout.
A s’ dos i pind ’ne pitite trompete,
Sins rovyî d’ prinde ene malete.
So s’ barete il åreut bén scrît :
Po les Bedots, c’ est mi l’ bierdjî !
Gustin, leu vraiy Bierdjî, esteut stindou a tere,
E trén d’ peter s’ prandjére[1],
S' gros tchén Picård, ronfléve come on soyeu,
Et les Bedots fijhént come yeusses deus !
L’ Leu po les fé tchaire dins s’n atrape,
Croet ki n’ risse rén d’ les apeler pa s’ vwès,
El fijhant l’ pus tene k’ i pout, i pile et pu il hape,
I poûsse des hoûrlumints[2], tot d’ on côp sins l' sawè !
Met tot cou dsu cou dzo, rén d’ ôte k’ e drovant s’ boutche !
Les Bedots, l’ tchén, l’ Bierdjî, sont rade so pî so foutche.
Efårdulé, cmelé, brouyî dins s’n abiymint,
I n’ sait nén fote el camp, ni rdårer on côp d’ dint !
