— Alans, dit-st i l’ Mônî, nos dalans vos complaire,
S’ gårçon dischind, et ttossu roed,
I prind s’ plaece, pike des deus, fel e fjhant clatchî s’ fwet !
Nén co n’ pixheye pus lon, resconte troes båsheles ;
— « Waite on pô, dit-st elle ene, fåt i esse feneyant,
« Po on foirt ome insi, d’ leyî shure èn efant !
« Et ça po fé di s’ cråne ! sol voye di Mårcinele !
— « Ça n’ vos rgåre nén djonne feye, et passez rade vo tchmwin,
« Dit-st i l’ Mônî ! gåre a vos si dj’ dischind !
Les båsheles ès djocnut ! mins creyant fé ’ne biestreye,
I prind s’ gårçon padrî, eyet ls è vla pårtis !
I n’ avént nén co fwait ’ne pixheye,
K’ arive ene binde di djins ki s’ metnut a criyî :
« Ndè vla deus k’ ont bén l’ tour, po tcherdjî leu bourike !
« Ô ! i n’ a rén d’ si seur, i front crever leu bike !
« Arindjî ’ne biesse insi ! fåt esse on vraiy bourea !
« Dandjureus k’ a Tcheslet, il evont vinde ès pea !
— « Asteure, dit-st i l’ Mônî, dji n’ sai comint m’ î prinde,
« Po continter les djins, sprovans on pô d’ dischinde :
— L’ pôve Bådet s’ ershofléve ! I n’ estént nén co lon
Ki rescontnut sol voye, l’ gros Tchårlot, leu maçon !
— « Tén, dit-st i, ki vola ! ou dalez ô ! vozôtes,
« Dalez vinde vo Bådet ? mins po vos fé l’ tchimin
« Pocwè n’ gripez nén dsu ? — Vos stoz dés droles d’ Apôtes,
« Vos uzez vos solés, vos estoz so vos dints,
« Po spårgnî l’ pea, les poys, eyrt les pîs d’ vo biesse !
« A vo plaece, jdel poitreu dins ’ne boesse ?
— Et bén, dit-st i l’ Mônî, si dj’ so biesse dji m’ e fout,
« Asteure, couzén Tchårlot, dj’ va bouter à m’-n idêye ?
« K’ on vegne dire ene sacwè, ou k’ on n’ dijhe rén do tout ?
— Eyet e tnant s’ parole, il a wangnî s’ djournêye.
Schoûtez bén mes efants : stoz portchî, ou studiant ?
Vindoz des peas d’ lapéns, des tchéns, ou bén des wants ?
