Kî çki fwait les canons, l’ poure, les bales, les fiziks ?
C' est l’ peupe todi muzlé, et k ’on fwait travayî !
Mins s’ i rclame trop ses droets, ou si vout s’ Republike,
Les åres k’ il a foirdjî, on les toûne rade conte li[1],
C’ est co l’ peupe conte el peupe, cwand deus Rwès s’ fwaiynut l’ guere
L’ pus foirt prind l’ payis d’ l’ ôte, et cénk miyårds d’ årdjint,
L’ Rwè fout rade tot dins s’ potche, avou ès govienmint,
L’ peupe k’ a pierdou paye tot ! po s’ coraedje : il a l’ glwere !
Et ds impôts so s’ toubak, s’ poeve et s’ sé, s’ mindjî, s’ boere !
L’ peupe wangnant nd a nén pus : ’ne djambe di moens ou on bras,
I ndè paye nén moens tchir, s’ boure et ses canadas !
Sins sacrifyî tant d’ djins, les Rwès dvrént s’ bate eshene[2],
Å moens payî d’ leus liårds, leus sotreyes, leus ferdenes[3].
Azor eyet Picard do Grand-Monarque.
On côp Azor, ene tchene di Tchålerwè,
Esteut plinne et n’ aveut pont d’ plaece,
Po s’ disbarasser di s’ paket !
Et s’ mwaisse l’ aveut tchessî sol rowe foice k’ i nd a lasse[4] !
L’ pôve tchene soctéve dins tos les cwéns,
Avou ses djonnes, presse a tchaire sol tchimin !
Ele s’ eva vir Picard do Grand-Monarque tot d’ shûte,
Po awè a pruster s’ cahute[5] !