« Cwè çki fwait on moxhon ? n' est ç’ nén ses plumes[1],
« Dji so sori, dj’ è vout å tchat[2],
« Vive les soris et vive les rats !
« Si dj’ a des ailes, c’ est po n’ nén wangnî d’ rume.
— Pa ç’ moyén la adroet eyet novea,
Deus côps elle a seu schaper s’ pea.
Ç’ fåve ci va come on want, po nos omes politikes,
Ki s’ dijhnut liberås, ki s’ dijhnut catolikes,
Shuvant k’ il ont dandjî d’ onk ou bén d’ l’ ôte pårti,
Po esse Erprezintant et awè les deus vôtes ;
Il ont fwait ça po onk eyet dit ça po ls ôtes ;
Des deus costés il ont minti.
El moxhon dischindou pa ene fletche.
On båyåd avou s’ fletche eyet ’ne mwaijhe årbalete[3] !
Aveut dischindou on pierot !
« L’ moxhon breyeut e djhant: n' est ç’ nén trisse eyet sot,
« C’t avou nos ailes, ki l’ fletche est fwaite,
« Nos vos dinans çki fout no piete !
« N’ vos fotoz nén d’ nozôtes, djins a cour di bôrea :
« C’ est k’ ene mitan d’ vo raece sins fåte.
Dinrè todi des åres a l’ ôte.
« Po vos distrure eshonne ! » ç’ n’ est nén çk’ i gn a d’ pus bea !
