Insulté, ataké, noeri pa 'ne mwaijhe malice,
N’ avans ns nén l’ tribunå, no droet, l’ råjhon, l’ djustice ?
Cwand ’ne sakî, come nos djhans,
Po s’ plaijhi s’ fout des djins, eyet cache des råjhons,
On dvreut tchaire tertos dsu, eyet a côp d’ baston,
Lyi fote ene boune luçon.
El Moirt eyet l’ Fijheu d’ fagots.
On vî grand pere rotéve, por lu rwangnî s' cahute[1],
Tcherdjî avou on fa ! c’ esteut on fjheu d’ fagots ;
Il esteut tot ployî, foice k’ il aveut må s’ dos !
Al fén i fout la s’ tchedje, i s’ estind dsu tot d’ shûte,
Avou s’ tiesse dins ses mwins, tot rindou tot cassé,
I sondjive e breyant, tot çk’ il aveut passé !
— « Ké plaijhi çk’ il a yeu dispu k’ il est so tere ?
« I travaye come on tchén, il est pôve come on vier !
« Sovint i n’ a pont d’ pwin ! S’ il a bén travayî,
« Pa on ritchåd sins cour, i n’ sai nén esse payî !
« Eyet pol pô ki wangne, on lyi fwait prinde patinte,
« L’ ouxhî est a ses trosses, s’ i n’ sait nén payî s’ rinte ;
« Il a pårtou sôdård, do tins d’ Napoleyon,
« Et sins sawè pocwè, il a stî s’ bate bén lon !
« On l’ a porshû lontins pol mete dins l’ gåre civike.
« Il a stî oblidjî, d’ ès fé keude ene tunike.
« S’ pôve viye feme må sogneye, esteut moite dierinnmint,
« Et i n’ aveut pont d’ liårds po payî s’-n etermint,
« On d’ ses gårçons, sôdård, a stî mis ås galeres,
« Pask’ il aveut dzarté po vni soladjî s’ pere !
« Et l’ ôte, målureuzmint, l’ ôte djoû a stî touwé,
- ↑ cahute purade ki cahoute po wårder l' rimaedje
