Combin d’geins dain c’monde ci qu’on admire simplémint,
Rin q’pou l’nô qui pôte nu, et pou leu n’habiemint :
V’la l’Pape qui s’coét l’bon Diœu, d’lé s’chavatte on trianne,
Esti méyeu qu’in aute, pou s’chapia ou s’soutane ?
In générâle fai l’bia, dain s’sako, n’plume au d’bout,
Esti pu brafe pou ça qué l’pu minabe pioupiou ?
In juche dain s’longue robe noère vo zévoye au galère !
Woételle bin desbiyi : c’est s’tin bon vi pépère !
Et jusqu’au Roé qu’on paye pou no moénner tertous,
Si tappe jû sés ôreries, c’n’est pu qu’in homme comme nous !
On d’vrét iesse comindét, r’moustrét pa dés geins d’tiesse,
Habiyî comme testous ! mai nô stons co trop biesses.
L’COULOURDIA DAIN L’BOUTIQUE GRIMARD.
In Coulourdia vudi dès cayaux dé l’carrière,
Estét r’cheu dain l’boutique Grimard ;
Crévant d’foim i cachét, à mingi et à boère.
Dain sés ôstis comme in boyard,
Du fier i n’conn’chét né co l’frime,
Tout rapogi i chai sû n’lime !
Frottant s’vinte i s’adaye rad’moin à agni d’dain,
A d’esquetté s’machoère, à d’esbrigi ses dints !
Mai l’lime li dit : « Joque tu, achoute :
« Woéte à tes dints mannette couloute !
« Quoé vousse ? rin n’mé destrû, i nia quà l’lonque du tins,
« Quand Grimard emm’fai r’lure, l’aci dain sés vèrins,
