L’MOUCHE EIÉT L’VI THOMAS DE L’DÉLIGENCE.
In joû su l’voye dé Mons, ell’déligence Vanguenne,
Ai aotée au pid d’in tienne!
C'estét dain l’fond dé l’desquinde d’Anderlû.
On avét kerchi l’impérialle,
Avét dés sat’ches, dés boèsses, dés cârtons et dés malles,
Si bin q’lés Ch’faux n’in pouvint pu !
L’vi Thomas, l’conducteûre, fiét clachi s’n’escorie,
Et l’caroche enne bougét né n’mie.
Enne Mouche qui voét l’dallâche, pou soulagi leû maû,
Et lés zaidé s’éva habie,
Pou lés fai avanci, brouyi autou dés ch’faux.
Sû l’néz rout’che dé Thomas sain géne elle va s’achire,
Pû desquin su l’timon,
Ell’déligence s’ermue, lé v’là quatte pas pu long,
Eiét l'Mouche coét q’c’est leye, qui fai ça sain rin dire!
Tout l’monde ai desquindu!
In gros curét mafflét, tout cru d’chaud, n’savét chure,
Pou l’fai rade avanci, elle lé pique su s’tonsure!
I fout s’bréviére d’zous s’bras, i rotte mitant fondu.
Enne feume démeure padri à tricotté n’chaussette,
In vi traine sés pejats! i s’estiét dé s’barette!
Pou fai tout avanci, in ehin et in effant,
Ell’Mouche séva padri pa d’vant,
Volé, brouyi, agni, v là l’caroche à l’coupette,
Fierre in fiant sés zesbrouffes, elle sé fout dain l’toupét :
Q’cestét bin pa sés poènes, qu’il estint arrivét!
Elle né pinsét né dain s’vintrie :
Q’si l’lavint attrapet, elle aurét sti spochie!
