« I m’fau n’saquoé d’pu fin! » I chai su in gouvion.
« Quoé! in gouvion pour mi?... Ostant m'foutte in kerton!
« I m'chenne qué jé m’sins foim! Cachons! v’là enne aublette!
« Ça n’vaut né l’poène dé sali enne assiette! »
Alauce qui crévét d’foim, i n’vénét pu d’Péchon!
Il a sti bin contint d’rescontré in lumeson.
Dain l’course dé no p’tite vie si in joù i s’présinte,
N’saquoé d’à mitant bon : affaire ou position,
Chéyons tout d’chutte dessus! profitons d’locâsion,
On pou trouvé pu mau, si on vout trop rattinde!
Comme nô l’dit bin in vî dicton :
« On passe in coup dain s’vie d’lé l’fôrtune sain l’comprinde. »
L’LION RMIS AU PID DU MUR.
In Lion qui s’coeyét l’pu fel dé tous lés roés, V’lét vire tous sés sujets t’tautou d’li v’ni s’achire!
- Comme i dise nu dain leû patoés,
- Mai leû biesses, pou miœu dire!
- A s’nôrde, pou n’rin cangi:
Iune dé chaque sôrte d’vèt li payi s’visite!
- N’iaurét à boère et à mingi ;
Fallét bin qui fuche bon! pou leû presté s’marmite! Mai l’sin qui n’vérét né, in l’liant s’tiesse in s’rét quitte!
- V’lâ qu’il aboule nu pa monchat,
- Dain s’palat in vrai raing d’pourchat!
