Aprèt s'pélérinache, su s’queuwe! à Sinte Rollande,
I savét r’mis dain in fromâche d'Ollande!
Ïl avét si bin fai d'sés pids d'sés moins :
Qui trouvét dain s’mogeonne, d'quoé rescuré sès dints,
Et i n'dé faut né pu, pou bin viqui su terre!
I d'vènét era et bia,
Il avét n’pance comme in tonia!
I mingét bin, i boévet bin, d’sét tins-zin-tins n'pàterre,
Eiét là d'sû pettét s'plangère.
Toés pelets Rats, d'lé li, venne nu pou fai l’pourchat,
Li pâle nu bia pou iesse dain s'manche,
Pasqui niavèt du poin su s’planche :
Il estint dain leu trau, bloquét pa n'binde dé chats,
On l’zavet l'lii parti, sain in liard dain leû sat’che,
Dé n’pétite charité il avint bin dangi!
Dain toés joûs i s’rint soulagi.
Mai l'Rat in ossant s'tiesse, dain s’trau rad'moin sabache :
« Nia rin à d'né, disti, et passét rade vo ch’moin
« Qué l’bon Diœu vo benisse,
« Et qué l'diâle vô rapisse!
« Vo n’auri né co n'crousse dé poin !
« J’dirai n’paterre pour vous : qué l'bon Diœu vô continte,
« Si ça n'vo rimpli né, ça n’vô donne né d’mau d’vinte! »
Là d'sù i r’clappe ess'n’huche radmoin.
C’est q’quand l'diâle dévint vî : i s'fai ermite!
Capucins, jésuites, récolléts,
Rabache nu leû pâterres, sain rachi dain l'mârmite,
In tutant du vi vin, avét lea pids crapéts !
On d’vrét brouch'té tout ça d’costét !
Pou Diœu ça va paiyi l’poin, l’argint d’in minuâche,
Des grands foires z’hommes ! dés vrais vaurins !
