sès grozès mains totès plakèyes.
Mins n' fåt nin cropi so sès-oûs ;
èt, d' sogne dè vèy rifreûdi l' påsse,
èle l'acouv'têye dizos l' cov'teû
qui tchâféve la, pindou d'vant l' feû.
XX. Li mêrihèdje
Come li ri qui hoûze è l'osté
la qu'i vint 'ne nûlêye di tonîre,
li påsse a monté bon-z-èt-reû,
tél'mint qu'elle è-st-å bwérd dèl mê.
Lès boh'nètes sont dèdja sol tâve
a ratinde lès pans qu'on va fé :
c'èst so leû hô qu' pol dièrainne fèye
cès-chal vont co 'ne miyète nanner.
Li cins'rèsse, tot levant l' cov'teû
po s'acèrtiner qu'il est timps,
apogne on coûtê la tot prêt'
èt, hayèt'mint, côpe foû dèl påsse
on gougnot mèz'ré d'on côp d'oûy.
Sol tåve èpoûss'lêye di farène,
èle li rôle, li toûne è tot sins ;
èt v'la qu'on pan tot rond, tot faît,
come par miråke vint foû d'sès mains,
po-z-aler dwèrmi d'vins 'ne boh'nète.
Èt, dèl vîle mê, onk après l'aute,
tot come ine hiède d'ognês tot blancs,
v'la qu'i sôrtèt, chaque al pus bê.
Mins fåt qu'on sondje å lèd'dimain :
la, so l'ah'lète, on bokèt d' påsse
èst dèdja prèt' pol cûte qui vint.
Èt, so l' timps qui l' pan lîve èl doûce tcholeûr dèl tchambe,
li feume, sins pus wê-ster, court po-z-èsprinde li fôr.
XXI. Li fôr
Tot-å coron dèl coûr, la po-drî lès manèdjes
qu'ont l'air di s' rapoûler po l' warandi dèl bîhe,
si drèsse li vî fôr di bleûve pîre.
