Pådje:Henri Simon - Li pan dè bon Diu - Li mwért di l’åbe, 1924 (adapt., préface et notes de Jean Haust).djvu/32

Èn årtike di Wikisource.
Cisse pådje ci a stî coridjeye ey est l’ minme ki l’ sicanaedje.


Li r'lûhant dè fiêr passe come l'aloumîre.

Ine saqwè djèmih et, d'zos lès tèyants,

lès pèsantès pôtes, prises come d'on toûbion,

s'abatèt sol tére qui lès-a pwèrté ;

èt, drî lès soyeûs, lès bates si stårèt

a longuès hièrtchèyes, qui lès racôyerèsses

d'on vigreûs côp d' séye mètèt-st-a djavês.


Ossu, so quéquès-eûres, on n' rik'noh pus l' payis.

Li campagne, ataquêye di traze èt traze costés,

si droûve divant lès fås ; èt dès longuès-alêyes,

si loukant totès vètes sol coleûr d'ôr dès grains

mostrèt l'ovrèdje qu'èst faît. « Qu'on-z-ataque a loyî! »

brait 1' maîsse. Et èt lès djavês div'nèt d'on côp dès djåbes,

èt lès djåbes dès tèssês, qui s' drèssèt so lès steûles

a longuès riguilites. Vos dîrîz-st-ine årmêye

abrotchant foû dèl tére ; mins c'èst l'årmêye dèl påy.

Èle nos-apwète li vèye : l'ome s'ènnè va tchèvi.


IX. Li tchèrièdje

Vola dèdja 'ne hapêye qu'on-z-a drèssî lès djåbes.

Èles-ont sûr faît leû r'djèt, ca vochal lès tchèrètes

qui d'hindèt dè viyèdje èt moussèt d'vins lès téres.

Li campagne, qu'aveût stu påhûle dispôy quéques djoûs,

si r'peûpèle èco 'ne fèye. Tos lès brès sont-st-èn oûve,

èt lès longowès fotches, ataquant lès tèssês,

lès d'molèt djåbe a djåbe, po tchèrdjî lès hauts tchårs

d'on grain bin sètch èt qui hil'têye la qu'on l'ètèsse.

Totes lès vôyes dè viyèdje sont rimplèyes d'atèlèdjes,

qui montèt, qui d'hindèt, onk al vûde, l'aute a tchèdje.

Lès rudions, lès-èssis, lès corîhes èt lès djins

hil'tèt, crînèt, claquèt, brèyèt. C'è-st on disdut

sins parèy. On veût l' djôye marquêye so lès visèdjes,

ca l' timps sièv a sohaît. Divins lès cinses, lès pwètes

sont tapêyes tot-å lådje èt lès tchårs moussèt d'vins,

tot fant rèsdondi l' coûr dès pèsants pas dès dj'vås.

Et, la qu' lès hauts cinas s'implihèt disqu'à teût

èt qui l' pièce mâque po l'rèsse, rade dès pîces si lèvèt

sol campagne, èt lès môyes s'èmontèt come dès tours

so ì' cîr riglatihant dèl loumîre dè solo,

qui s' lêt rider, bin pâhûl'mint, la, drî lès tiérs !