Pådje:Henri Simon - Li pan dè bon Diu - Li mwért di l’åbe, 1924 (adapt., préface et notes de Jean Haust).djvu/24

Èn årtike di Wikisource.
Cisse pådje ci a stî acertinêye pa deus contribouweus.
18
LI PAN DÈ BON DIU

L’ome tchåsse li blanc sèmeû, vis-èl rimplih a make
èt, d’on djèsse todi l’minme, d’on grand djèsse qui v’s-a l’air
dè voleûr acoyî tot çou qu’il a d’vant lu,
— d’on djèsse qui nos rapinse li ci qu’ fèt lès priyèsses
tot tapant l’ bèneûte êwe èl grande påhûlisté
qui djômih è l’èglîse, — i sème, èl keûhisté
dèl campagne qui fruzih al prumîre blanke rålêye.

Lès hos d’ôr, tot gruz’lant foû dèl main qui lès hène,
s’abatèt tot spitant sol tére qui lès rawåde
èt trèfèle dè ravu lès-èfants qu’èle pwèrta…

On côp d’îpe lès rafûle, on côp d’îpe lès-ètére :
i n’ont pus qu’a djèrmi.


III. Li sûrdèdje

Èt l’ome a rèminé sès-ustèyes èt sès dj’vås,
èt v’la l’ sèmé d’manou tot fî seû sol campagne.

Portant, d’zos li spèheûr dèl tére qu’avise d’èsse mwète,
on rèsse di vèye djômih, ine fwèce catchèye oûveûre.
L’ameûr fait hoûzer l’ ho, qui sclate è deûs bokèts :
ine pitite rècinète, on rin, crèh è baheûr,
tot fant qu’on djèt s’èlîve èt trawe li dègn di d’zeûr.
Et vola tot d’on côp, so l’ sèmé qu’èsteût nou,
qui dès mèyes èt dès mèyes di bètchètes sititchèt,
totès fènes, totès dreûtes, qui v’ dîrîz dès-awèyes.
Li tére candje di coleûr ; lès djètons s’ dirôlèt,
s’acouv’tèt, s’aboh’nèt, s’èmontèt, vèrdihèt,
d’on bê vért qui r’glatih plin d’ameûr èt d’ djonnèsse.

Qui l’iviér vinse asteûre ! Li grain, fwért èt vigreûs,
pout ratinde, sins crankî, lès djalêyes èt lès freûds.


IV. L’iviér

Vola l’iviér vinou : so lès téres disseûlêyes,
pus rin, ni djins ni bièsses.
Lès r’lûhantès-èrêres, rètrôk’lêyes è tchèri,
s’arènihèt dèdja,