I fåt portant qu’ lès dj’vås soflèsse :
l’ome arèstêye sès deûs bayårds
èt, dismètant qu’i toûne li tièsse
po loukî l’ovrèdje abatou,
vola qu’ d’å fî fond dèl brouheûr
tote grîse, qui rafûle li campagne,
aspite ine nûlêye di cwèrbås ;
èt, come si ’ne saquî l’zî dèrisse
qui por zèls l’eûrêye èst la prète,
vo-lès-la plonkîs, tot brèyant,
å mitant dè tchèrwé qui fome ;
èt, so lès roukes come è l’arôye,
c’è-st-on disdut, c’è-st-on sam’rou
di neûrès-éles èt d’ vigreûs bètch
ramèh’nant tot l’ måva bisteû
qui l’èrére vint d’abouter foû.
Ossu, qwand l’ome veût leûs-èhowe,
i s’ sint tot honteûs dè n’ rin fé,
ca, d’on côp, dispièrtant sès dj’vås,
vola qu’i rataque a tchèrwer.
Èt, si longue qui l’ djournêye sèrè,
tot come l’arègne qui tèh si teûle,
l’èrére va tant toûrner dès côps
qu’i n’ dimeûr’rè rin dèl siteûle.
II. Li sèmèdje
Li djouhîre èst tchèrwêye. L’èrére si pout r’pwèser.
Ossu, l’ome èl lêt la po prinde ine aute ustèye.
C’èst d’abôrd l’îpe, qui drèsse vès l’ cîr sès bètchous dints,
prête a-z-agridjî l’ tére. L’ome l’a dèdja r’toûrné ;
lès dj’vås sont-st-atèlés, li prumîre plène tapêye ;
èt, d’zos l’ustèye qui faît dès hopes
tot k’tèyant lès rôyes dè tchèrwé,
lès cwårts èt lès roukes si fondèt,
li tére si brîhe, si strûle èt håle.
Mins, come i d’meûre co dès groubiotes
qui l’îpe roûvèye, li pèsante wèle
passe tot wîgnant sol tére tote hole
èt v’s-èl sipate tot come on dègn.
