A on novea scolî, on lyi metéve dabôrd divins les mwins li croejhete, ki cmincive po l’ croes d’ par-Diew, afisse k’ i s’ segnaxhe divant do lére; et po-z esse pus abeye, nos djhîs simplumint, tot metant on doet so l’ front: pér....... soit-il; pu on loméve vint-set letes l’ ene après l’ ôte. Les deus prumires, c’ esteut l’ grand A et li ptit a. On les prononcéve come e francès, såf troes: li v si loméve vu (po nén dire vé; li w si lijhéve doblu, et po l’ z on djhéve zetâ. Après l’ zetâ c’ esteut l’ etc, ki rprezintéve li condjonccion francesse et : l’ alfabete finixhéve par li mot est, k’ on spelixhéve é-s-t aiss. On dmanéve po l’ moens èn an la dsu !
Çou ki shuvéve l’ A-B-C, c’ esteut l’ Notru-pere, l’ Åvé-Maria, li Crois-en-Dieu le pere, les cmandmints d’ Diew et d’ l’ Eglijhe, pu les sillabes ba, bè, bî, bô, bu; ca, cè, cî, etc, imprimêyes so on foyou a pårt.
Ossu vite ki l’ poupåd parvinéve al prumire roye do notru-pere, i recoréve a dadaye e s’ måjhone po anoncî l’ boune novele; si mere, tote binåjhe, n’ aveut rén d’ pus håsté ki d’ aler dire a ses vijhenes: mi fi k’ est a n-o-note !! Ele lyi dnéve deus aidants po des ceréjhes, c’ esteut-st ene fiesse e manaedje, on magnive des pailêyes di boûketes.
On pô pus tård, si l’ efant aveut polou lére ou seulmint speli a dmeye bén li prumire pådje tote etire, novele djoye, novele fiesse; li mame aléve co tchawer tos costés: mi fi k’ a tourné l’ foyou !! Ci djoû la, on fjhéve co ene gasgogoye po l’ mazete.
Après l’ croejhete, vinéve li keur d’ amour, pitit live di nouv ou dijh pådjes, tot rimpli d’ l’ amour di Diu; i contnéve des påters, des akes di fwè, di contricion, et des ôtes.
Li live di comunion acsegnive çou ki faléve fé divant et après li cfession, divant et après l’ comunion.
Li ptit et l’ grand catruceme estît a pô près çou k’ i sont co ouy, ormis sacwantès kestions on pô trop enocinnes po on sieke di loumire come li nosse. On-z a bén fwait di les saetchî foû; elle ont stî replaeceyes pa des ôtes pus a poirtêye del djonnesse d’ asteure, k’ est bén pus sincieuse et pus malene ki nos n’ l’ estîs !
On trovéve divins l’ live Djezus-Cri li nexhance, li veye, li passion et l’ moirt di Nosse-Signeur.
