A on novai skolî, on lî mètév dabôr divin lè min li creûhett, ki kminsîf po l’ creû d’ pâr-Diew, âfiss k’i s’ segnah divan dè lér ; è po ess pu-z-abèie, no dhî simplumin, to mètan on deû so l’ fron : pér… soit-il ; pui on loumév vinte-sett lète l’eunn aprè l’ôte. Lè deû prumîr, c’esteû l’ gran A è li pti â. On lè prononcéf kom è francè, sâf treû : li v si loumév vu (po nin dîr vé) ; li w si léhév doblu, è po l’ z on dhév zétâ. Aprè l’ zétâ c’esteû l’ etc, ki rprézintév li conjonkcion francess et : l’alfabett finihéf par li mo est, k’on spèlihév é-s-t aiss. On dmanéf po l’ mon inn an la dsu !
Çou ki sûvév l’A-B-C, c’esteû l’ Notru-pér, l’Avé-Mariâ, li Kroi-an-Dieu lè pér, lè kmânnmin d’ Diew è d-l’Eglîss, pui lè sillab ba, bè, bî, bô, bu ; ca, cè, cî, etc, inprimaie so on foïou a pâr.
Oci vitt ki l’ poupâ parvinév al prumî rôïe dé notru-pér, i rèkorév a dadaïe è s’ mohonn po anoncî l’ bone novel ; si mér, tote binâh, n’aveû rin d’pu hâsté ki d’alé dîr a sè wèzenn : mi fi k’ess-t-a n-o-nott ! ! El lî dnév deû-z-aidan po dè cèlîh, c’esteû-t-ine fiess è manech, on magnîv dè pailaie di boûkett.
On pô pu târ, si l’èfan aveû polou lér ou seûlmin spèli a dmèie bin li prumî pâch to-t-ètîr, novel jôie, novel fiess ; li mam aléf ko chawé to costé : mi fi k’ a toûrné l’ foïou ! ! Ci joû la, on fév ko n’ gasgogoïe po l’ mazett.
Aprè l’ creûhett, vinév li keûr d’amoûr, piti lîv di noûv ou dî pâch, to rinpli d-l’ amoûr di Diu ; i contnév dè pâtêr, dè-z-ak di foi, di kontricion, è dè-z-ôtt.
Li lîv di komugnon acsegnif çou ki falév fé divan è aprè li kfècion, divan è aprè l’ komugnon.
Li pti è l’ gran katricem estî-a po prè çou k’i son co oûïe, ôrmi sakwantè kestion on po tro-z-ènoçaînn po on siék di loumîr com li noss. On-z-a bin fai di lè sèchî foû ; ell on stû ranplaçaie par dè-z-ôtt pu-z-a poirtaie del jôness d’asteûr, k’ è bin pu sincieûze è pu malenn ki no n-l’estî !
On trovév divin l’ lîv Jèzu-Kri li naiçanss, li vèie, li pacion è l’ moir di Nott-Signeûr.
