Pådje:EL-TA-WON - Èl Pitit Fonfonse, 1954 (in El Bourdon, num. 55).djvu/1

Èn årtike di Wikisource.
Cisse pådje ci n’ a nén co stî coridjeye
ÈL PITIT FONFONSE
DEUXIÈME PARTIE
Èyu ç’ qu’il èst ?

I gn-ara bén râde èn’ an, au cras-mârdi, qui l’ Pitit Fonfonse èyèt s’ feume, Lili, ont fét èchène leû dénrène pourmènâde a Châlèrwè, pou vir passé l’ cortège. Come direut l’aute, èl min.nâdje n’aleut pu qu’ d’ène fèsse! Fonfonse n’aveut pu qu’ène idéye dins s’ tièsse : foute èl camp avou l’ magot, lès 250.000 francs, qu’ Lili aveut gangni al Lot’rîye colognale, avou l’ biyèt qu’èle aveut yeû au tchaufeu d’ taxis, Djan-Pôl. S’ ti-ci, éyèt Lili, s’is-ârît sti tafèt’mint libes, i gn-a longtimps qu’is s’rît pârti pou l’ Congo. Is s’ wèyît voltî. El Pitit Fonfonse s’è douteut; mins, tireû d’ plan come il èsteut, i rumineut, gnût-èt djoî, l’ mèyeeû moyén pour li di s’è d-alé an France. I li chèneut qu’in côp passé l’ frontyère, i sâreut mia djouwé s’ quénte.

El dimègne dèl Pint’cousse, i s’ luve pu timpe qui d’abitude; il aveut aprustè ’ne pitite valise, qu’il aveut lèyi bén a vûwe, su s’ fauteuy’ dins l’ cujène. I gn-aveut nén grand-chôse didins, sakants biyèts d’ cint francs dins n-in vî pôrtè-feuy’, deûs mouchwès d’ poche èy’ in prospèctus’ du Djardin Zologique d’Anvèrs’.

Eyèt su l’ timps qu’ Lili aveut sti qwé s’ bouli au boutchi, sèm’di au gnût, il aveut diskindu dins l’ côve, prinde dins s’ catchète padrî l’ djantî, èl bwèsse avou lès lyârds. Il l’aveut muchi, dins n-in gris papî, su l’ bocô a l’intréye dèl côve, èyu ç’ qu’i gn-a qu’ dès viyès gazètes èt dès ranchèn’rlyes qu’on n’ boutche jamés.

Es’ n-impèrmèyébe, ès’ tchapia a bôrds rabatus èstît prèsses au porte-manteau, corse ès’ gnyèr-di-boû, qui d’mèreut toudis la d’ayeûr. Au matin, in côp s’ bâbe sicrèpéye, i s’a botè èt, tout al bèlote, il a pris s’ valise, il a mètu l’ bwèsse padzou s’ bras èyèt s’ n-impèrmèyâbe al coupète, pou l’ mia muchi; yèt vogue èl galère, vèl’la st-èvoye! I prind l’ vôye dèl gâre du Sud! Lili, qu’aveut choûtè s’ manèje, a wéti pa l’ fègnèsse da lawaut, quant-èle l’a ètindu vûdî. En l’ wèyant pârti, avou s’ valise a s’ mwin, èle si dit qu’i s’è va a Anvèrs’. Yér au plût, avant di s’ coûtchi, èle aveut d’ayeûr passé s’ n-inspècsyon dins l’ valise èy’ èle aveut surtout wéti l’ pôrtè-feuy’ èyèt l’ prospèctus, d’Anvèrs’.

— Bon vwèyâdje, camarade Fonfonse, si dit-stèle.

Ele si r’mèt dins s’ lét, èt rumine pou z-arindji s’ djournéye! Naturèl’mint, èle conèt lès-abitudes da Djan-Pôl; èle li r’trouvèr’ra quant s’ra s’n idéye.

— D’Anvèrs’, pinse-t-èle, I n’ rintèr’ra nén d’vant neuf-dîj’ eûres. Ah! P’tit Fonfonse, vos-avèz sondji d’ m’irluvé pa l’ sink’; trop p’tit, vî strin!

Qu’èle si djeut! Mins, èle ni s’imajineut jamés tout çu qu’i d-aleut s’ passé.

Al place di prinde èl trin pou Anvèrs’, li P’tit Fonfonse a monté dins l’autocâr da Jean Gofe qui pârteut pou Reims; il aveut payi s’ place dispus ’ne grosse samwène; il aveut bén combiné s’ quénte!...

In côp wôrs di vûwe di s’ môjo, i mèt s’ bwèsse dins s’ valise. Avou s’ tchapia, s’n impèr èyèt s’ gnyèr di boû, il a p’tète l’ér d’ in maquignon; ça lyi plét bén ainsi. Dins l’autocâr, noulu n-èl conèt, èy’ i n’irconèt noulu!...

Fét-a-fét qu’on z-aproche dèl frontyère, il a come in pwèd dju d’ s’istoumac’. Il a l’ér di sokyi ’ne miyète. Et quant-on lyi adrèsse èl parole, i fét come s’il èsteut deur d’orâye. A l’ vlr, on lyi don’reut l’ bon Djeu sins confèssion!

A l’ douwane bèlge, il a l’ér di pèté in ikè d’ tous lès djâles; au tchaufeû d’ l’autocâr qui rassembèle lès cârtes d’identité, i rèspond

- Em’ carte d’antiquité?... Pouqwè fé?

- Pou pwinté au bûreau d’ douwane!

- V’la, Mossieu, dit-st-i, l’ pu djintimint du monde!

Et i s’irmèt a sokyi d’èn’ oûy pasqui d’ l’aute, i wéte a cwane tout ç’ qui s’ passe du costè dès douwanyés!...

Tout va bén! Vla l’ chaufeû d’ l’autocâr qui r’vént prinde ès’ place! Avant d’ dèmaré, i criye au micro a sès cliyents

- Atincyon! atincyon!... Si ’ne saki dwèt dèclaré ’ne sakwè al douwane francèsse, i diskind’ra avou mi èyèt m’ chûra au bûreau.

A deûs, twès cints mètes pu lon, on stope; twès-omes éy’ ène coumére chuv’nut l’ chaufeû. In douwanyé francès monte dins l’autocâr; i tape ès’ n’oûy’ pâr-ci, pâr-la. I mousse avou s’ dwègt l’ valise du P’tit Fonfonse.

S-ti-ci, fèyant l’ djèsse di mète dins s’ bouche pou mindji, dit : « Boustifâye! »…

- Ça va, dit-st-i l’aute. Et i passe dé ’ne coumére qui lyi d’mande :

- Awou t-èst-ce qu’on peut n-allér cassér la croute?

- Là-bas, ma jolie, vous s’rez en France; et vous pourrez vider une bénédictine pour la digestion.

- Ele âreut mia un bènèdictin, fét-i li P’tit Fonfonse!

- Voyez-vous ça, hein, le p’tit pèpère!… Quel vicieux!

On rit; l’ douwanyé diskind tout fyèr di s’ réplique; èt Fonfonse si r’cougne dins s’ cwin pou pèté in some, d’èn’ î, bén-ètindu!…

El tchaufeû è-st-a s’ volant! El Pitit Fonfonse ni sondje pu a dwârmu, I guigne a dwète, a gauche! A vré dire, i vwèt nén grand-chôse; i pinse a ç’ qu’ i va fé; i rapètache tout ç’ qu’il a èmantchi.

Dins s’ tièsse, i conte sès liârds; c’ èst qu’il a pris sès précôcyons, li P’tit Fonfonse!... Dins s’ valise, il a co djusse 200.000 francs bèlges!... Dins potche d’an d’dins di s’ djilèt, il a l’ pôrtè-feuy’ da Lili avou lès biyèts francès qu’il a candji pou 50.000 francs, al Banque di France, dins l’ reuwe di Marcinèle.

— Dji seû pu qu’ milionére, si dit-st-i !

Et chaque côp qu’i sondje a Lili, i djure dins sès dints an ajoutant, «qu’èle foute él camp au Congo, avou s’ Djan-Pôl ! c’èst pour li tous lès djous!!! »

Arivè a Reims, il a pârti tout dwêt d’vant li, come s’i con’cheut l’ vile! quant-il a sondji qu’ lès cliants du câr Jean Goffe ni sârit pu l’ vir, il a rintrè dins-n-in « bistro ». Il a mindji èt d’mandè l’ guide dès tch’mins d’ fyèr, s’apinse a li!…

I riyeut tout seû, an sondjant qui l’ tchaufeû d’ l’autocâr èl’ ratind’reut au gnût pou râlé a Châlèrwè!

I lyi chèneut qu’il ètindeut d’ja lès autes vwèyajeûrs dimandé : « Eyu qu’il èst l’ maquignon?… »

Ey’ i rèspondeut : « Cache après !… mi, dji fou l’ camp! Salut, la compagnîe!…

EL-TA-WON