Vola deûs fèy qu’ i sâye dè magnî s’ souwêye crosse,
mins s’ coûr hôssihe dissus, qwèqu’ il âye faim portant ;
c’ èst ’ne vèye crossète di pan qui n’ a vormint nou gos’
èt ç’ vî ome-la qui brube aproche lès sèptante ans.
Mâgré lès bons chèrvices qu’ il a rindou al fosse,
ni fât-i nin qu’ i rote, pusqu’ i s’ troûve sins-êdant ?
Lès dose eûres sont passêyes, èt noste ome tot halcrosse
s’ arète djusse divant l’ pwète d’ on bê gros rèstaurant.
Li pwète dèl ritche dimeûre è-st-a mwètêye sèrêye.
Ine fène odeûr vint foû, èt s’ vint piède sol pavêye :
li sinteûre dès bons mèts qui fricassèt d’ leû mî.
Et la, nosse vî brubeû prind s’ deûre crosse foû di s’ potche,
hagne divins tant qu’ i pout, sins qui s’ pôve coûr ni potche :
li bone odeûr qu’ i home èl fêt tot l’ minme magnî !…
(1872-1948)
