Pådje:Ch. du Vivier de Streel - Li pantalon trawé, 1993 (M. Piron, Anthologie, 112-114).djvu/3

Èn årtike di Wikisource.
Cisse pådje ci a stî coridjeye ey est l’ minme ki l’ sicanaedje.

mês d’ côporål, dji r’div’na simpe sôdård
gråce ås costeûres di m’ pantalon trawé !
 
Div’nou flankeûr d’vins lès canifich’tônes,
on m’ rimoussa, dj’eûri on pantalon,
dji magna m’ sô, dji div’na come on mône,
mi qu’aveû stu come on vî dj’vå d’ gosson.
Mês on k’mandéve d’on si drole di lingadje,
lès côps d’ baston ni fît qui dè rôler,
dji m’ anoya, dji souwa come ine catche,
èt dji r’grèta m’ pauve pantalon trawé.

Dj’èsteû nåhî, awè, ciète, djèl pou dîre !
Mês qu’èst-ce qui c’èst ? dji n’ saveû nou mèsti.
Dj n’åreû sawou måy rintrer è l’ houyîre,
dj’inme li grand êr, dji n’ såreû m’ racrampi.
Mês, tot d’on côp, volà qu’-n-a brôye-manèdje
èt qu’à Brussèles, on-z-ôt l’ canon groûler !
Dj lès planta là, sins l’zî dîre bon voyèdje :
dj’ prinda m’ såro èt m’ pantalon trawé !
 
Dji m’a batou come on bon påtriyote,
dj’a stu blèssî, dj’a må tos mès-ohês,
dji n’ dimande rin èt n’ pou-dje ni l’ hay ni l’ trote,
ca l’ diâle todi tchèye so l’ pus gros hopê…