Pådje:Annuaire de la Société liégeoise de Littérature wallonne, 1863, vol. 1.djvu/46

Èn årtike di Wikisource.
Cisse pådje ci a stî coridjeye ey est l’ minme ki l’ sicanaedje.
— 40 —

Avou m’floche et mes galons d’laine,
Ji sos fir comme on capitaine ;
Ji n’sos pus on honteux jônnai,
Ji rott’ tot k’hoyant mes vannais
Et ji sos si gâye es m’bleuv’ jaque
Qui j’sos r’loukî d’tot’ les feumreyes.
J’a m’tabeur, etc.

A c’ste heur’ qui j’sés r’mouwer l’baguette,
On n’mi scol’ pus comme in’ haguette :
Mi siervic’ fait, l’après l’diner,
Li pus sovint, j’vas porminer,
D’zos les bois d’fawe et d’havurnac,
Tot seu avou l’crolêye Mareie.
J’a m’tabeur, etc.

Quéll’ bell’ vei’ qui l’ciss’ des sôdârs,
On wagn’ tos les jous deux patârs ;
Li mestî n’est nin mâlâhî
Et, qwand di n’rin fer j’sos nâhî,
Ji m’mette à fer des armanacs
So noste av’nir avou Mareie.
J’a m’tabeur, etc.

Si mâie on jou nos avans l’guérre
Ji compt’ bin fer dè brut so l’tère :
Tot comme on diale et des deux mains
Ji bouh’rè so mi instrumint,
Ca ji m’sins vormint li stoumac
Tot pleint d’on corèg’ sins pareil.
J’a m’tabeur, etc.