Viyès tecnikes
Les tcherwaedjes ataként todi avou l’ tcherowe. On-z a co veyou des eraires sins ou avou on shabot dvant, replaeceye après par ene pitite rowe. I faleut sey foirt adroet et bén abitouwé po fé del bele tcherowe.
Li simpe brabant esteut ddja ene bele amelioråcion so l’ eraire. Mins, avou lu, i faleut ataker å mitan ou azès deus costés do boket, çou ki fjheut k’ on-z av’ ene schavroûle di tchaeke costé et èn adosmint å mitan. Ou bén l’ grosse schavroûle å mitan. L’ anêye d’ après, on-z aroyive contraire po rnivler l’ terin.
Les dobes brabants ont facilité l’ ovraedje, sortot po disroyî les bokets avou des coûtès royes et po fé les triviès.
Dins les anêyes céncwante, on-z a transfôrmé les dobes brabants po les adapter azès tracteurs å rlevaedje idrolike. On-z a minme fabriké des tcherowes especiåles po les tracteurs sins rlevaedje, notamint la marke : Brending.
Dins les ôtes markes, dji vons citer : Melotte, Drago, Hert, Huard, Baeke, Baeke 114 di tor, International, do Greef, Steno, Demblon, Dethy, Viåd, Lemken, ... et des ôtes, li dierin siyon.
Après ça, ç’ a stî les bi-, les tri-, les cwadrisoks, et todi dpus k’ on-z arive. Les pus grosses, c’ esteut po l’ bon payis.
Après l’ tcherowe, on passéve avou l’ role ou l’ erisson, ki s’ loméve ossu picot u picoteuse (loukîz el Rantoele 36, p. 9). Aprume po les dierinnès tcherowes då prétins, po rbate li tere et n’ nén fé trop d’ waezons, sortot dins les batis.
C’ est l’ seracuze ou l’ cultivateur-estirpateur ki continouwéve l’ ovraedje e passant deus ou troes côps so longueur ou d’ triviè.
Les seracuzes estént a 5, 7, 9, 12 ou 15 dints po les tchvås et disk’ a 30 et pus po les tracteurs. Si i gn av’ del påne [chiendent], on passéve deus ou troes côps a l’ îpe so longueur et lårdjeur, et on levéve les îpes regulirmint cwand ele estént plinnes, po ramasser l’ påne. On schoyeut l’ tere foû del påne al fotche, po fé des ptits hopeas [tas] ki souwént kékes djoûs so les hourleas [talus] divant d’ les broûler.
Sovint, cwand on passéve a l’ îpe, on meteut deus tchenas [panier] so l’ ustêye, ey e rotant, on tapéve les pires dins onk. L’ ôte, c’ esteut po les cécorêyes [pissenlit, salade des champs] k’ ataként a crexhe et k’ estént co blankes, po fé del boune salåde. Et tot çouci a tot schoûtant les «grizoles» des ålouwetes tchanter e montant, divant di ridschinde e pike, po s’ catchî dins les fours.
Cwand on fjheut l’ mårs avou les tchvås et k’ on-z av’ des cavales k’ avént poûtné d’ boune eure, i faleut disteler å mitan d’ l’ advant-nonne et d’ l’ après-nonne po vni fé teter les polins. Ça purdeut do tins et les djournêyes estént coûtes.