Dji m' rapèle vâgmint avèr co veyou on vwezin ou l'ôte ki chnikot so l' boc. Dès ôtes batint co â flèyô so la tère dol grègne. Après ça i tapint la dinrêye dins l' ratche k'èstot pindou avou one grande tchin.ne a on seûmî ou al charpante èt avou on mouvmint bin spécial, i vanint dja one grande pârtîe dès «payes» foû dol dinrêye. Après ça i la r'passint a ptit van d'ozié ki, lu avou, d'mandot on toûr di mwin spécial. Des ôtes avint dja on grand van. On z-ave on constructeûr come wèzin, câzi: Adolfe Perreaux a (Fèyi-Nadrin), Nickelman (Sâm'tchèstè), èt Dominicy (St Léger), de St Hubert, Wolf, Akila,…
Lès preumîres bateûses n'èstint nin brâmint pu grosses k'on grand van. Èles avint one manivèle di chake costé avou one grande roûe dantée ki fzot toûrné la ptite so l'acse do batwar, èt i falot deûs fwarts omes po tni l' mouvmint.
C'èstot on batwar a broches èt on angrin.not ki lès pâtes dol djâbe. Voci avou i falot passé la dinrêye â ratche, â ptit ou â grand van. Lès cinsîs k'avint dja one pus grosse bateûse, la fzint toûrné avou on manéje acsioné par deûs tchfôs ou deûs boûs. C'èstot on sistême on pô comparâbe a on carouzel a l'èvièr, c'èst lès tchfôs an toûrnant, ki fzint la force motrice po fé toûrné la bateûse ou l' haksèleû. Dji m' rapèle addé ma Mârine, al cinse d'â Mwin.ni-Lontchamp, la bateûse èt l' haksèleû èstint montés sol l' bèrôdî. Il èstint acsionés par li manéje ki s' trovot o ravalante podrî la cinse, li long dol route. Lès batwars èstint di deûs types : a broches ou a bâres. Li preumî, c'èstot come on tonê an grosse tôle avou dès dèts di 5-6 cm di long, ki an toûrnant passint intèr lès min.mes dèts k'èstint fiksés sol contre-batwar, ki lu èstot réglâbe. Li batwar a bâres èstot brâmint pus long, èt il èstot fét di sèt-hût bâres a nèrvures fiksées so on long cilinde. Li contre-batwar èstot réglâbe avou. Tos lès djoûs, on nètchot lès bâres do batwar, paski al longue, i n' toûrnot pus rond.
La preumîre bateûse ki dj'é vèyou o nosse mâhon, c'èstot one pitite «Tixhon èt Coheur» di Herstal, avou one grande fotche k'aminot li strin so l' gril dès loyeûs. La deûzime, c'è stî one «Dominicy 22 AS» di St Léger, a simpe nètwayadje, èt la treûzime, one «Ködel èt Böhn» a dobe nètwayadje, ki dj'ave rachté a Jean Evrard a Wand′ borcy.
D'jazans on pô asteûre do batadje prôpremint dit. Li djoû di d'vant, on z'aprètot lès satch ét on fzot on hopè di dobes rawètes avou deûs pougnèyes di strin d' grin ranokées al pâte. Po bin alé, i falot sèy one èkipe di cwate djins po bate : onk so l' tas s' la môye, li tapeû; l'angrin.neû s' la machine, èt deûs ôtes po loyi lès strins èt wêti azès satch, lès loyeûs. Cand on batot one môye, i gn-ave co sovint on cinkime ki rifzot la môye di strin ou bin ki tchèrdjot d'on côp so lès tchârs. La pus léde dès plèces c'èstot lès loyeûs k'èstint tot′ djoû al gueûye dol machine et ki mougnint tote la poussîre, lès lamçons, êt dès côps la poussîre ki moussot foû dès dinrèyes, k'avint tchâfé al rintrèye, èt ki hapot al gwadje. On s' rapèle co l' goût èt l' souvnir. C'èst zèls èt l'angrin.neû ki sintint surtout lès tchèdrons bin sètch adon. On z-ave la grin.ne èt li strin, mês on ave avou lès «payes»; lès cisses di frumint, d' blé èt d'avon.ne, on lès wârdot po fôré lès bièsses, tandis ki lès poûfrins do grin èt do wadje, on lès broûlot. Lès «payes» d'avon.ne sièrvint surtout avou a rimpli lès payasses dès lits ki fzint ofice di «matlas». Dji v' s' assure k'on ave bin bon èt bin tchôd dins cès payasses la, mês bondjoû lès poûssîres po lès fèmes. Cand on batot les cawes di rat, on drovot lès vans â pus grand po n' nin aspiré lès sminces. Divant k'on n' vinde lès prèsses po lès strins, cèrtins dismontint li loyeû dol loyeûse èt l' metint al sôrtîe dol bateûse, èt avou one grande tchin.ne èt on pignon al bateûse, i fzint dès grosses djâbes di strin. C'èstot do sistême D! On z-è vindou a c' tins la dès gros loyeûs parèys azès ci d' loyeûses ki fzint dès pus grosses botes. Ça n'è wêre duré. Lès prèsses a one ou deûs cwades ont avou on gros sucsès avou, èles sipârgnint dol min d'eûve. Après la deûzime guère èt dja d'vant probâbe, la Comârden di Mamdi ki fornichot l'élèctricité, toûrnot lès viadjes avou one grosse bateûse po bate lès dinrêyes dès particuliés, surtout lès môyes. Li cabinié purdot l' courant al ligne. Dins lès anèyes 50-55, on Grand-Ducô è v'ni bate ol réjion avou one mwassoneûse-bateûse Claas tractèe. I tirot lès rabateûs èt la lame k'èstint ramplacés par one tâve èt l'angrin.neû èstot al tère. On-ôte bê sovnir d'adon, c'èst la tchèsse ki les tchins èt lès tchèts fzint azès surus cand on z'arivot o fond d'on tas ou d'one moye! C'èstot l'sâve ki pout!!!
A pârtîr d'adon, lès bateûses ont tot doûçmint passé al feraye, come brâmint d'ôtes machines d'alieûr. C'èst po ça ki dji v' rapèle lès principales markes: azès treûs dédja citées pus hôt dj'ajoute: Neis, Claas, Claeys, Standart, Legile, Wéker, Smétryns, Dechentreiter, Lister (Landen), Raussendorf, Excelsior, de St Hubert,…
Lès difèrantes markes di prèsses èstint : Claas, Welger, Schumaker, Köla, Neis, Nordsten, Legile, Raussendorf,… Âl sôrtîe dès prèsses on z-ave one rampe ki montot lès botes jusk'a treûs m di hôt dirèkteumint sol tchâr. Lès grin.nes po lès sminces èstint vanées â grand van èt pwis passées o trieû po lès calibré èt z-aver totes les nichtés foû : come les pâdrônes et les pwès d'ohès. Dji va cité lès kékes markes di vis′ a grins : Albert, Kongskilde, Mélotte, Samas, Fava, Thiérion, Ravéna,...
Dins lès trieûs a grinnes, dji n'é veyou ki cès deús ci : de St Hubert èt Heid (Autriche).
On fzot dol haksèle avou li strin d' frumint èt d' blé po fé la fôre azes tchfôs k'on machot avou l'avon.ne èt «l' sucrèma ou sucra-payes». C'èstot dès payètes di lin machîes avou dol mèlasse. Ça ave bon goût èt one bone odeûr, èt lès tchfôs è rafolint. Po rivni a haksèleû, cand on mètot l' moteûr élèctrike, i falot bin prinde la précôcion d' fé tourné la courwa â d' foû do volant, ôtrumint si èle toûmot an d'dans, c'estot bèrnike, la courwa estot côpée a deûs, adon i falot la r'fé avou one agrafe spéciale. On z-ave avou one brike di «colant» po lès courwas. C'estot one brike di résine spéciale k' aspétchot la poulîe do moteûr di patiné, èt d' mintni la courwa sos lès poulies.
Dj'arivans asteûre azès molins ki zèls egzistants dipû ki l' monde èst monde. On l'è bin vèyou dins l' bê lîve da Jaky Adam so lès molins d' l'Ourthe Orientale, one bone carantin.ne, di Ourthe-Gouvy jusk'a ci di Spitintje a En'grè. Èt l' rèsse dol réjion an pus′! On z-alot régulièrmint â molin: an minant one tchèdje, on r'purdot la cisse dol cwinzinne di d'vant. C'èstot one perpétuwèle porcèssion, onk âdjoûrdu èt l'ôte dimwin ou après. Lès molêyes po lès bièsses si loumint sovint «lès passes». Po fé l' pwin, on fzot môre do grin, dol blé ou do frumint, èt c'èst adon k'on z-ave dès latons ou dès rbulèts. La cinsrèsse dimandot todi di fét fé «on marcotè ou malcotèye», on ptit satch di «fleûr», dol farine co pus fine po cûre, lès tâtes èt lès gatôs, al dicâce ou azès grandes fièsses. Èt èle è purdot sogne, surtout dès surus!
Après la guère, chake cinsî è avou on molin ou on aplaticheû. On môlot pus fin lès porcés ki po les rodjes bièsses. Et tos l's-ans â prètins, lès monîs fzint l' toûr dès cinses po r'bate lès pîres. O nosse mâhon, c'èstot Jozef Wuidart di Vel'rè. Lès markes di molins ont stî fwart nombreûses avou. Mês a tot sègneur, tot oneûr: Josef Genin (Râmont); Joseph a St Servais, (originère di Nèfe), Martens, Fava, Record, Albert, D.D.D., International, Dania, Law, Rebell, Matton, Ley, Vicon, Sabia, Mika, Triumph, Wihelma Record, Schmotzer, Heywang, Félix,…