Lès labours atakint todi avou la tcheroûe. On-z è co vèyou des èréres sins ou avou on sabot dvant, ramplacé après par one pitite roûe. I falot sey foirt adret' et bén abituwé po fé del bèle tcheroûe. Li simpe brabant estot dja one bèle ameliorâcion so l' èrére, mês avou lu, i falot ataké a mîtan ou azès deus costés do bokàt, çou ki fzot k'on-z ave one chavrôle di chake costé et on adosmint a mîtan, ou bén la grosse chavrôle a mîtan. L' anèye d' après, on-z aroyiot l' contrère po r'nivlé l' terin. Les dôbes brabants ont facilité l' ovradje, surtout po disroyi les bokets avou des coûtes royes et po fé les triviès. Dins les anèyes cincante, on-z è transfôrmé les dôbes brabants po les adapté azès tracteurs a rlevadje hidrôlike. On-z è min.me fabrike des tcheroûes speciâles po les tracteurs sins rlèvadje, notamint la marke :Brending. Dins les ôtes markes, dji vons cite: Melotte, Drago, Hert, Huard, Baeke, Baeke 1/4 di tour, International, do Greef, Steno, Demblon, Dethy, Viaud, Lemken,… et des ôtes, li djèrin siyon. Après ça, ce stî les bi, les tri, les cwadri socs, et todi dpus k'ont arivé. Les pus grosses, c' estot po l' bon payis.
Après la tcheroûe, on passot avou l' role ou l' erisson, surtout po les djèrin.nès tcheroues d'â pretins, po rbate la tere et n' nén fé trop d'wèzons, surtout dins les batis. C' est la siracuse ou l' cultivateur extirpateur ki continuot l'ovradje an passant deus ou troes côps so longueur ou d' triviè. Les siracuses estint a 5, 7, 9, 12 ou 15 dints po les tchfôs et jusk'à 30 et pus po les tracteurs. Si i gn ave del pâne, on passot deus ou treûs côps a l' hipe so longueur et lârdjeur, et on lèvot les hîpes réguliérmint cwand eles estint plin.nes, po ramassé la pâne. On choyot la tère foû dol pâne al fotche, po fé des ptits hopès ki souwint kékes djoûs so les hourlés divant d' les broûlé. Sovint, cwand on passot a l' hîpe, on metot deus tchènas so l'ustêye, et an rotant on tapot les pires dins onk, et dins lôte, les chicorêyes k'atakint a crèche et k'estint co blankes, po fé del bone salâde. Et tot çouci a tot schoûtant les "grisolles" des alouwetes tchanté an montant, divant di ridtchinde an piké, po s' catchi dins les foures.
Cwand on fzot l' mårs avou les tchfôs et k'on-z ave des cavales k'avint poûtné d' boune eure, i falot distèlé a mîtan d' l' advant nonne et d' l' après nonne po vni fé tèté les polins. Ça purdot do tins et les djournêyes estint coûtes.
Dins totes ces machines la, po travayi les teres, on pout cité les markes les pus knuchoûyes: Melotte, Albert, Kongskilde, Sogemec, Agrotiler, Howard Rotavator, Bottin, Drago, Dethy, do-st Hubert, et po les roles: Falisse et Dominicy,…