Novèles èt Binde à dèsséns/X

Tot chover

Dj’a chové tote li coû. I faureût r’mète dèl têre dins lès pots d’ fleûrs, elle a moru di s’ bèle mwart, sins-ansène, gn-a pus rén qui vikerè jamaîs là d’dins. I n’a nin falu trwès djoûs po qu’ l’ortensia èt mès rôsis d’ Chine qu’ dj’aveû r’piqué au bon timps n’ crèvenuche. Dji m’a stî r’pwâser stinduwe dissu l’ balcon dins m’ fastrou d’èsté. Dji m’a laîyî carèssî pa on solia d’iviêr, cotchèssî pas dès nûléyes sayant d’ lî clawer s’ bètch. Dj’a rabroké en d’dins quand l’ plaîve à èdaumé sès rogacions. Fabiène vént d’ moussî foû dèl sicole di musique. Èle trivièsse li coû avou sès soçonnes po-z-aler prinde leû lèçon d’ taï chi. Dji conè par keûr tot ç’ qu’èle faît. Jaki lî, mi-y-ome, il è-st-a Brussèle. I bèrdèle divant one banceléye di pratiques di s’ banke. Il èst crau payî pas sès maîsses po sayî d’ leûzi scroter l’ trop plin d’ leûs potches. I m’èvôye on SMS totes lès deûs-eûres po m’ raconter tot ç’ qu’i l’zeû boure èl tièsse. Mi fèye èt m’-y-ome vikenut dins m’ tièsse come si dj’ sèreû on mirwè èwou qu’i s’î pourîn’ riconèche. Djè l’ voureû fé, dji wadje qui dj’ sareû lès fé candjî d’ vôye. Mète mi mwin d’ssu leûs lèpes po lès- èspêtchî d’ raconter trop d’ prautes. Leû d’ner on côp d’ pingne quand il ont one tièsse come on ritchaud. Dins lès montéyes dj’a crwèjelé l’ bisaude dau quatryinme. Li sindic’ n’a nin co rèyussî à l’ fé mète à l’uch. Tos lès djoûs, sins fén, sès galants montenut èt d’chinde : cèst l’ cas dè l’ dîre. Dji m’ dimande co bén si Jaki ni s’ rilève nin dèl nut po l’aler r’trover à catchète, quand dj’ lî r’fuse one margâye di djambons. C’èst quétefîye po ça qu’il èsteût tant binauje l’ôte djoû quand nos-avans d’djuné. Ayîr al nut, dji m’aveû inventé on mau d’ tièsse po chaper al corwéye di djambe è l’aîr qu’on lome cougnî yinte nos deûs. I m’ faureût bin aler trover on psi, po n’ nin yèsse oblidjîye di cachî après one saqwè d’ novia ôte paut. Nin on secse-toys, in ! Dèl boune grosse saucisse, oyî ! À m’ lèçon d’ioga, tot l’ monde avot l’ tosse. I m’ choneûve ètinde burtoner lès microbes. Tot-z-èralant, dj’a stî qwêre do pèchon po l’ diner. À trwès-eûres l’oncologue di l’ospitau Sinte Lisbèt’ m’a tèlèfoné po m’ dîre qui dj’èsteû r’faîte, èt qui dj’ n’ètindreû pus jamaîs causer dèl cancèr à mi stoumak. Dj’a stî r’qwêre Fabienne al sôrtîye dèl sicole. Èlle aveût on rodje boton su s’ nez. Djè lî a d’mandé èwou qu’èle l’avot co stî tchoukî. Si binète à toûrner fine rodje. Po m’ fé pârdoner djè lî a acheté dès baskèts. Jaki à rabroké su l’ côp d’ yut-eûre, mwai come on pu d’awè raté s’ trin. Dj’a drèssî l’ pèchon à tauve. Dji n’è p’leu pus d’èdaumer one novèle vièspréye èchone come d’abutude. Dj’âreû v’lu yèsse dins m’ lét, li maujone èdwârmuwe. Dj’areû v’lu qui l’ nuléye lache deûs mètes di nîve èt nos-édjaler d’zor lèye…