(Djozefene est crevêye)
1.
Mes djins, si dj' a l' oumeur tchagrene,
Si dj' a del poenne et des tourmints,
C' est ki m' pitite gade Djozefene
A crevé ayir å matén.
Dj' a creyou rçure on côp d' massuwe,
Et dj' a brai tot come èn efant
Cwand dji l' a la rtrové stindowe
Dins l' cwén d' no rmijhe, e m' erlevant.
Resploe
Non, dji n' ervierè pus
Mi ptite gade adorêye.
El Bon Diu l' a volou,
Djozefene est crevêye.
2.
C' esteut vraiymint ene boune pitite biesse.
Dj' ervoe co ses iys si lujhants
Ki m' erwaitént, plins d' djintiyesse,
Cwand djel daléve moenner ås tchamps.
Drola, m' ashidant dins l' pasteure,
Dj' caresséve si tiesse dins mes mwins.
Et leye, pôve pitite creyateure,
Ele m' erletchive di contintmint.
Å resploe
3.
Dji sognive si bén m' pitite gade
Ki m' feme end a stî djalote, sovint.
Ele mi djheut: « Metoz l' dins del wate,
Et sinez lyi vosse testamint ! »
Mins tot ça, c' est des ravådaedjes,
Et si, di m' gade, dj' end esteu sot,
C' est k' avou leye, måy pont d' ramaedjes,
Måy pont d' grognons ni d' côps d' shabot !
Å resploe
4.
Disca nos biesses endè sont disbåtcheyes;
No pourcea n' vout pus rén mindjî.
Nos poyes end ont atrapé l' pepeye;
Gn a co troes d' crevêyes so l' fumî.
Et, nos deus vatches, ki l' diåle m' epoite,
N' ont pus dné ene pinte di laecea.
Creyoz m', dji nd a veu d' totes les sôres
Dispu k' Djozefene n' est pus la !
Å resploe
5.
Djozefene esteut si djinteye
Ki dji nel såreu måy rovyî.
Djel consideréve del famile
Télmint ki djel veyeu voltî.
Et dins no cinse, vos m' poloz croere,
Po vs prover k' nos stans disbåtchîs,
Nos n' avans fwait k' dire des priyires
Po k' ele s' è våye å Paradis.
Å resploe
Les candjmints di rfondaedje dispu l' anêye 2000 ont stî aplikés roci.
Schoûtez lu vaici (1,2,3 & 5)