(Josèfine èst crèvéye)
1.
Mès djins, si dj’é l’umeûr chagrine,
Si dj’é dèl pwène èt dès toûrmints,
C’èst qui m’ pètite gade Josèfine
A crevé ayîr å matin.
Dj’é cru r’cèvwêr in côp d’ massûwe,
Èt dj’é brét tout come in-èfant
Quand djè-l-l’é la rtrouvé stindûwe
Dins l’ cwin di no r’mîje, an m’ luvant.
Rèfrin
Non, dji n’èrvîrè pus
M’ pètite gade adoréye.
Èl bon dieu l’a voulu,
Josèfine èst crèvéye.
2.
C’esteut vrémint ‘ne boune pètite bièsse.
Dj’èrwè co sès-îs si lûjants
Qui m’èrwétun’, plins d’ djintiyèsse,
Quand dji daleu l’ min.ner as tchamps.
Drola, m’achîdant dins l’ pature,
Dj’ carèsseu si tièsse dins mès mwins.
Èt lèy, pôve pètite crèyature,
Èle m’èrlètcheut di contint’mint.
Rèfrin
3.
Dji sogneu si bén m’ pètite gade
Qui m’ feume d’a stî djalousse, souvint.
Èle mi d’seut: « Mètèz l’ dins dèl wate,
Èt signèz lyi vosse tèstamint ! »
Mins tout ça, c’èst dès ravôdâdjes,
Èt si, di m’ gade, dji d’asteu sot,
C’èst qu’avou lèy, jamés d’ ramâdjes,
Jamés d’ grognons ni d’ côps d’ chabot !
Rèfrin
4.
Djusqu’a nos bièsses dè sont d'bôtchîyes;
No pourcha n’ vout pus rén mindjî.
Nos poûyes d’ont atrapé l’ pèpîye;
Gn-a co trwès d’ crèvéyes su l’ feumî.
Èt nos deûs vatches, qui l’ diâbe m’èpôrte,
N’ont pus doné ‘ne pinte di lacha.
Crwèyez-m', dji d'é vu d’ totes lès sôrtes
Dispûs qu’ Josèfine n’èst pus la !
Rèfrin
5.
Josèfine asteut si djintîye
Qui dji n’ sâreû nén l’ roubliyî.
Djè l’ considèreu dèl famile
Tél’mint qui djè l’ wèyeu vol’tî.
Èt dins no cinse, vos pouvèz m’ cwêre,
Po vos prouvér qu’ nos stons d’bôtchîs,
Nos n’avons fét qu’ dîre dès priyêres
Pou qu’èle s’è vâye ô Paradis.
Rèfrin
Schoûtez lu vaici (1,2,3 & 5)