Mierseus
I.
I l' avént ascoyî, tot håynant des coxhetes
Lu, ashî so èn ågne, soriyeut-st a catchete.
Cénk djoûs après, l' minme ome, avou s' tchape di spinetes,
E les oyant boerler, les waitive al taxhlete.
« S' i vs plait, binamé Bon Diu,
S' i vs plait, passez co ladsu !
I n' savèt dedja çk' i fjhèt.
I n' savèt dedja çk' i djhèt. »
II.
Il aveut scarwaitî les stoeles eyet l' solea.
« C' est bén nosse bole ki toûne », k' i resplikéve å mia.
Kéne afwaire, kéne afwaire, a Lidje et co a Rome !
Li Tere, c' est l' cinte, pardiè ! Pont d' kesse ! Ni cwè ni come !
Et dvant ses djudjes, il a dit
Dandjreus k' i s' aveut mari.
Pu, po n' si nén disminti :
« Portant ele toûne » a-t i rdit.
« Gn a nén rén k' ti »,
Di dj', mi !