Coplet 1
Mi ptit poyon, mi ptit moxhon,
Dé les suzons dirî l’ måjhon,
Dji vs vénrè co vey a catchete ;
Dji prindrè co mi ptite sårpete ;
Dji dirè k’ dji fwai des ptits bwès
Sol blokea dizo l’ pene do toet.
Rifrin 1
C’ est bea, l’ amour des djonnès djins
Co minme k’ i n’ plait nén ås parints.
K’ c’ est bea l’ amour des djonnès djins
Co minme k’ i freut cåzer les djins.
Vinoz vs ascwati adlé mi ;
Mi ptit moxhon, dji vs voe voltî.
Coplet 2
Dj’ avans crexhou dins l’ minme coulêye ;
Dji rivnéns di scole pal schavêye ;
Dj’ ans stî code ås fraijhes, ås meurons,
Ås noejhetes al erî-såjhon.
Taiss k’ åy, nos parints n’ s’ inmèt waire ;
Nozôtes, nén pus, dji n’ end ans d’ keure.
Rifrin 2
C’ est bea, l’ amour des djonnès djins,
Sortot s’ i n’ plait nén ås parints ;
K’ c’ est bea, l’ amour des djonnès djins,
Sortot s’ i fwait canler les djins.
Vinoz vs ascropi adlé mi ;
Mi ptit pouyon, dji vs voe voltî.
Coplet 3
Cwand dj’ doe wårder ås vatches tote djoû,
Vos, vos vnoz code azès froumdjons.
Gn a des fleurs griblé sol praireye
Et vo vos la tote cafloreye.
Si nos parints sont higne et hagne,
Dj’ end alans nén fé ene montagne.
Rifrin 3
C’ est bea, l’ amour des djonnès djins,
Minme ki les parints ni vlèt nén.
K’ c’ est bea, l’ amour des djonnès djins,
Minme s’ i fwait ragadler les djins.
Tos les cis ki nos criticront,
K’ i vonxhe å diåle et co pus lon !
Coplet 4
Tchaeke côp k’ on atrape on condjî,
On s’ dit l’ eure so on ptit papî.
On l’ tchôke dins ene craeye do petrea
Dilé l’ schalete do park des veas.
Si les parints sont-st a margaye,
Po nozôtes, tot ça, c’ est des djaeyes.
Rifrin 4
C’ est bea, l’ amour des djonnès djins,
Co minme k’ i n’ plait nén ås parints.
K’ c’ est bea, l’ amour des djonnès djins,
Minme s’ i fwait dagouner les djins.
Vinoz vs resserer adlé mi;
Mi ptit colon, dji vs voe voltî.
Coplet 5
Fåt nd aler rilever l’ catchete
Come ene bricole po les robetes.
Si mwintes côps dj’ alans fé corwêye,
Dj’ estans fén binåjes a l' idêye
Ki, si les parints ont ene brete,
Nozôtes, dji nos fjhans des clignetes.
Rifrin 5
C’ est bea l’ amour des djonnès djins,
Co minme k’ i n’ plait nén ås parints.
K’ c’ est bea l’ amour des djonnès djins,
Minme s’ i fwait ragueter les djins.
Vinoz vs ascwati adlé mi ;
Mi ptit moxhon, dji vs voe voltî.
Coplet 6
Por mi pacô, c’ est l’ ratournêye ;
A vosse måjhon, c’ est ene fessêye
Paski, swe-dijhant, dj’ ans tårdjî ;
Mais dji n’ nos lairans pus rdinguer.
Si les parints sont-st a bisbrouye,
Dji lzî alans fote el coye berdouye.
Rifrin 6
C’ est bea, l’ amour des djonnès djins,
Sortot s’ i n’ plait nén ås parints.
K’ c’ est bea, l’ amour des djonnès djins,
Minme s’ i fwait berdeler les djins.
Vinoz vs ascropi adlé mi ;
Mi ptit pouyon, dji vs voe voltî.
Coplet 7
Moman nos e veu mierkidi ;
M’ a reclôs al cåve ås soris.
Dj’ a brai si tant foû d’ mes deus ouy
Ki les låmes sipitént sk’ ås doyes.
Ey a s’ tcherete, gn a l’ pere ki boute ;
Mi dj’ les evoye al Sint-Ferfote.
Rifrin 7
C’ est bea, l’ amour des djonnès djins,
Minme ki les parints ni vlèt nén.
K’ c’ est bea, l’ amour des djonnès djins,
Minme s’ i fwait radoter les djins.
Tos les cis ki nos criticront,
K’ i vonxhe å diåle et co pus lon
Coplet 8
Cwand dji srans dins les grandès scoles,
Dj' elzî alans djouwer ene bele crole.
Dji srans seur tcheryîs på minme busse.
I s’ è vont rtrover raezibusse.
Dj’ wådrè todi ene plaece e fond
Po rawè sovnance des suzons.
Rifrin 8
C’ est bea, l’ amour des djonnès djins,
Co minme k’ i n’ plait nén ås parints.
K’ c’ est bea, l’ amour des djonnès djins,
Minme s’ i fwait ravåder les djins.
Vinoz vs resserer adlé mi ;
Mi ptit colon, dji vs voe voltî.
sicrît a Rabat, li 30 di decimbe 1982