Enute, dji vos vôreu cåzer d’ on ptit bwès ki dj’ a sol dizeu del Foret, li viyaedje del Simwès ou k’ dji dmeure.
C’ esteut dinltins des tchamps k’ avént stî pris so les bwès del comene. Adon, on loméve l’ edroet « les vîs tchamps ». C’ est co todi l’ no e cadasse. C’ est l’ toponime, come dijhèt les savants. Cwand dj’ esteu djonne, on coûtivéve co l’ plaece, mins pus po lontins paski l’ nateure a yeu vitmint rtrové ses droets.
E moumint ou k’ dj’ a cmincî a netyî l’ terén, i gn aveut des nichtés pattavå. Dji m’ bateu avou les ronxhîs, les schôdrûles, les fetchîres et les djniesses, k’ estént pus grandes ki mi. Et pu, i gn aveut co des mwais åbes, come bråmint des sås, ki n’ siervèt a rén.
Adon, dj’a pris mes hatches, mes såpes, mi tronçneuse et m’ grande disbouxhneuse [débroussailleuse], et dj’ a metou totes ces usteyes la dins ene rimorke. Å long des anêyes, esté come ivier, dj’ a bouté dins les nichtés et les mwais åbes, les picas des ronxhes et les hagneures des schôdrûles. Dji n’ wårdéve ki les tchinnes, les hesses, les bôles et kékes sipiceyas. C’ esteut ene målåjheye bataye conte li nateure, paski les salopreyes rivnént toltins. Mins avou l’ tins, li bwès s’ a sclairi. I gn a minme on boket k’ est come on park.
Dj’ a ossu fwait on tchmin ki moenne a ene pitite croes ki dj’ a dressî åd dibout do terén.
Li tchmin – ki dj’ a fwait, don – passe ossu dins on clairisse (on trô sins åbes) la k’ i gn a on tchinne a l’ imådje. Dins nosse foclôre, c’ est èn åbe ki, dinltins, les djins avént metou dsu, ene pitite posteure del Madone. Come i gn aveut pupont d’ tchinne a l’ imådje dins nosse contrêye – end aveut yeu on fameus padzeu les viyaedjes di Mambe et d’ Bôhan, mins il est distrût dispu des anêyes – come i gn aveut pupont d’ tchinne a l’ imådje, di dj’, dji m’ a don metou dins l’ tiesse d’ è rfé onk. Adon, so on bea djonne tchinne – djonne, mins k’ esteut ddja gros – dj’ a clawé ene potale avou ene pitite Madone, ki n’ est nén d’ plastike, mins k’ est vraiymint ene posteure di biscûte d’ Andene. Sifwait ! C’ est ene potale ki våt bén des pecayons.
Mågré k’ dji n’ so nén foirt poirté so tot ça, tchaeke côp k’ dji vén divant m’ tchinne a l’ imådje, dji doe dire ene åvé, et co ene priyire des boskiyons. Et pu, dins m’ bwès, gn a co des flåwes si des vîyès bônes. Les vîyès djins dijhént ki, del nute, on pleut ôre des moirts ki dmandént eyu k’ i les dvént rmete. Cwè rmete ? C’ esteut des bônes k’ il avént candjî d’ plaece di leu vicant, ki les moirts vlèt cåzer. I n’ plèt nén aler å paradis ossu lontins ki les bônes ni sont rmetowes a leu djusse plaece.
Po fini, dji vos vôreu co dire ki dj’ a dné on no å bwès. Et dji n’ a nén dvou cweri foirt lon po lomer l’ plaece paski, djusse a costé, i gn a on leu ki s’ lome « li Poto ». C’ esteut on poto indicateur ki s’ dressive dinltins e croejhmint del voye di Suni et do vî tchmin di Sdan. Adon, dj’ a lomé m’ bwès : « Li bwès do Poto ».
Çou ki m’ fwait rire, c’ est k’ les djins ki s’ pormoennèt creyèt pa des côps ki ç’ n’ esteut nén on postea po mostrer les voyes, mins k’ c’ esteut ene potince ki s’ håssive laddlé. Mins ni vs sibarez nén. I gn a pont d’ pindou dins m’ bwès.
ås scoles di Bive (scole pa les scolîs), li 7 di may 2024